Maliyyə

Ana səhifə

Maliyyə

«United Credit Bank» son bir ildə aktivlərini 6% artırıb

16 dekabr 2010 12:57 (UTC +04:00)

Bakı. Elnur Hüseynquluyev – APA-Economics. Azərbaycanın «United Credit Bank» ASC-nin aktivlərinin həcmi 2010-cu il dekabr ayının 1-nə 40,968 mln. manat təşkil edib ki, bu da 2009-cu ilin dekabrın 1-nə olan göstərici ilə müqayisədə 6,1% çoxdur.

Bankın İdarə Heyətinin sədr müavini Vahid Əliyevin «APA-Economics»ə verdiyi məlumata görə, hesabat dövründə bankın kredit portfeli 8,4% artaraq 31,840 mln. manata, o cümlədən istehlak kreditlərinin həcmi 12,6% artaraq 13,857 mln. manata çatıb. Bu müddət ərzində bankın depozit portfeli 1% genişlənərək 11,838 mln. manat, o cümlədən müddətli depozitlər 15% artaraq 9,886 mln. manat, tələb olunan depozitlərin həcmi isə 38% azalaraq 1,951 mln. manat olub.

Müddətli depozitlərin strukturunda fiziki şəxslərin əmanətləri 15% artaraq 7,935 mln. manat, hüquqi şəxslərin depozitləri isə 2 dəfə artaraq 3,418 mln. manat təşkil edib. Eyni zamanda, tələb olunan depozitlərdə hüquqi şəxslərin əmanətləri 67% azalaraq 0,666 mln. manat, fiziki şəxslərin depozitləri isə 16% artaraq 1,207 mln. manat olub.

Bununla yanaşı, hesabat dövrünün sonuna bankın məcmu kapitalı 1,1% artaraq 12,943 mln. manat, o cümlədən nizamnamə kapitalı sabit qalaraq 12,108 mln. manat təşkil edib.

Qeyd edək ki, cari ilin yanvar-oktyabr aylarında bankın gəlirləri 11,5% artaraq 5,244 mln. manat, xərcləri isə 8,8% artaraq 6,024 mln. manat olub.

Xatırladaq ki, təsisçisi 1 hüquqi və 2 fiziki yerli şəxs olan «United Credit Bank» ASC 1996-cı ildə «Rossiyskiy Kredit» Rusiya-Azərbaycan Kommersiya Bankı kimi yaradılıb və 1998-ci ildə brendini dəyişib. Cari ilin dekabr ayının 1-nə bankın 5 filialı, 5 bankomatı, 39 POS-terminalı və 115 işçisi mövcuddur.