Maliyyə

Ana səhifə

Maliyyə

«Qala Həyat» sığorta şirkətinin ilk rəsmi təqdimatı keçirilib

27 dekabr 2010 10:40 (UTC +04:00)

Bakı. Elnur Hüseynquluyev – APA-Economics. Bu gün Bakıda «Qala Həyat» sığorta şirkətinin aktiv fəaliyyətə başlaması ilə bağlı mətbuat konfransı keçirilib.

«APA-Economics»in məlumatına görə, tədbirdə «Qala Həyat» sığorta şirkəti İdarə Heyətinin sədri Abbas Babayev bildirib ki, «Qala Sığorta» şirkəti 2008-ci ildən qeyri-həyat sığortası üzrə fəaliyyət göstərir. Bu ilin yayında səhmdarlar tərəfindən şirkətin fəaliyyət profilinin həyata sığortasına dəyişməsi ilə bağlı qərar qəbul olunub: «Müvafiq sənədləşmə işləri başa çatdıqdan sonra bu fəaliyyət üzrə lisenziya almaq məqsədi ilə Azərbaycan Maliyyə Nazirliyinə müraciət olunub».

A.Babayevin sözlərinə görə, lisenziyanı həyat sığortasına dəyişməzdən öncə şirkətin müvafiq işçi qrupu bu sahədə Ukrayna, Rusiya və Gürcüstan təcrübəsinə öyrənib: «Bu ölkələrdə həyat sığortası üzrə müvafiq qanunvericilik təsdiq olunmazdan əvvəl həmin ölkələrin sığorta bazarının məcmu yığımları aşağı səviyyədə olub. Sonradan Ukrayna, Rusiya və Gürcüstanda müvafiq qanun təsdiqləndikdən sonra yığımın həcmi bir neçə dəfə artıb. Hesab edirik ki, Azərbaycanda da bazarın analoji inkişaf templərini müşahidə edəcəyik».

A.Babayev bildirib ki, həyat sığortası bazarı Azərbaycanda yeni yaradılan bazar olduğuna görə, şirkət 2011-ci ildə bu sığorta növləri üzrə yığımların həcmini proqnozlaşdıra bilmir.

Tədbirdə «AzRe» təkrarasığorta şirkəti İdarə Heyətinin sədr müavini Vüsal Abbasov «Qala Həyat» sığorta şirkətinin inkişafı üçün «AzRe»nin daim dəstək verəcəyi bildirib: «İnanıram ki, həm «İstehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi hallarından icbari sığorta haqqında» qanunun tətbiq edilməsi, eyni zamanda şirkətdə peşəkar sığorta mütəxəssislərinin olması məqsədlərimizin uğurla nəticələnməsinə səbəb olacaq».

V.Abbasov 2013-cü ilədək «Qala Həyat» sığorta şirkətinin nizamnamə kapitalının 5 mln. manata çatdırılacağını bildirib: «Bu kapital həm şirkətin əldə etdiyi mənfəət, həm də əlavə səhm emissiyası hesabına artırıla bilər. Ümumiyyətlə, bu sahədə əsas məqsədlərdən biri əldə edilən mənfəəti «Qala Həyat» şirkətinin kapitallaşmasına yönəltməkdir».

Xatırladaq ki, «Qala Sığorta» şirkəti 2008-ci ildən fəaliyyət göstərir. Bu ilin noyabr ayının 30-da şirkətin adı «Qala Həyat» sığorta şirkətinə dəyişib. Şirkətin təsisçiləri rolunda «AzRe» təkrarsığorta şirkəti (88%) və 1 fiziki şəxs (12%) çıxış edir. Şirkət həyat sığortasına aid 5 könüllü və 1 icbari sığorta növləri üzrə xidmət göstərir.