Maliyyə

Ana səhifə

Maliyyə

Azərbaycan üçün aktual olan iqtisadi risklər açıqlanıb

11 mart 2011 10:21 (UTC +04:00)

Bunu «APA-Economics»ə açıqlamasında Azərbaycan Milli Elmlər Akademiyası (AMEA) İqtisadiyyat İnstitutunun direktoru İsa Alıyev bildirib.

İ.Alıyevin sözlərinə görə, dünya ölkələrində baş verən ərzaq qıtlığı ərzaq təhlükəsizliyi problemini aktuallaşdırıb: «Çünki biz hələ də özümüzü ərzaqla tam təmin etmirik».

«Azərbaycan üçün də vacib olan risklərdən biri də ABŞ dollarının dünya bazarındakı mövqeyi, o cümlədən onun məzənnəsinin aşağı düşməsi ilə bağlıdır: «Azərbaycanın valyuta ehtiyatlarının böyük hissəsi dollarla yerləşdirildiyinə görə, dolların məzənnəsinin aşağı düşməsi Azərbaycan üçün problem yarada bilər. Azərbaycan iqtisadiyyatına da təsir edə biləcək digər məsələ Çin pulunun dünyanın aparıcı valyutaları sırasına daxil olması ehtimallarıdır. Bütün bunların fonunda Azərbaycan manatının bahalaşması nə dərəcədə düzgündür? Biz belə vəziyyətdə özümüzü qoruyub saxlaya biləcəyikmi, güclü dövlətlər bizim sərvətimizi sorub apara bilərlərmi? Ümumiyyətlə pul-maliyyə sistemi ilə bağlı qarşıda çox ciddi məsələlər dayanıb», - deyə İnstitutun direktoru vurğulayıb.

Azərbaycan üçün aktual olan digər risklərdən biri enerji təminatı ilə bağlıdır. Alimin sözlərinə görə, hazırda neftin bahalaşması ilə əlaqədar olaraq bunu başqa ölkələr də hiss edir: «Azərbaycanın öz nefti var, amma bu da gələcəkdə tükənəcək. Bəs bizdə 10-15 ildən sonra nə olacaq? Hesablamalar göstərir ki, Azərbaycan sürətlə sənayeləşsə, daxili enerji tələbatı təqribən 2 dəfə artacaq».

İ.Alıyev bu risklərin qarşısının vaxtında alınması və qiymətləndirilməsi üçün elmi tətbiqiqatların vacibliyini vurğulayıb.