Maliyyə

Ana səhifə

Maliyyə

Azərbaycan və Gürcüstan arasında fond bazarında əməkdaşlığa dair memorandum imzalanıb

11 mart 2011 14:56 (UTC +04:00)

Bakı. Nicat Mustafayev – APA-Economics. Bu gün Azərbaycan Qiymətli Kağızlar üzrə Dövlət Komitəsində (QKDK) Gürcüstan Milli Bankı İdarə Heyətinin sədrinin müavini Otar Nadaraianın başçılıq etdiyi nümayəndə heyəti ilə görüş keçirilib.
QKDK-dan «APA-Economics»ə verilən məlumata görə, görüş zamanı Komitənin sədri Rüfət Aslanlı Azərbaycan və Gürcüstan arasında ikitərəfli münasibətlərin dinamik inkişaf etdiyini və iqtisadi əlaqələrin genişlənməsinin hər iki ölkə üçün qarşılıqlı fayda verdiyi bildirib. O, iki ölkə arasında maliyyə bazarlarının, xüsusilə də qiymətli kağızlar bazarının inkişaf etdirilməsi üçün potensialın mövcudluğunu qeyd edib. R.Aslanlı bu baxımdan ölkələrin qiymətli kağızlar bazarlarına dair əməkdaşlığın rəsmiləşdirilməsindən məmnunluğunu nümayəndə heyətinin diqqətinə çatdırıb.
Sonra QKDK və Gürcüstan Milli Bankı arasında qiymətli kağızlar bazarları sahəsində Əməkdaşlıq və İnformasiya Mübadiləsi haqqında Anlaşma Memorandumu imzalanıb. Memorandumu Gürcüstan tərəfindən O.Nadaraia, Azərbaycan tərəfindən isə QKDK sədrinin müavini İlqar Muradov imzalayıblar.
Memorandum ilə ölkələrarası əlaqələrin yeni mərhələyə qədəm qoyacağını bildirən QKDK sədri əməkdaşlıq çərçivələrini təmin edilməsinə, qarşılıqlı anlaşmanın və ikitərəfli əlaqələrin genişləndirilməsinə, texniki və tənzimləyici informasiya mübadiləsinin gücləndirilməsinə və investorların hüquqlarının müdafiəsinə yönələn bu sənədin gələcəkdə yeni birgə layihələrin həyata keçirilməsinə zəmin yaradacağına ümidvar olduğunu söyləyib.
Öz növbəsində O.Nadaraia bu Anlaşma Memorandumunun imzalanmasını iki ölkə arasında qiymətli kağızlar bazarlarına dair əməkdaşlığın gələcək inkişafında mühüm rol oynayacağını bildirib.
Qeyd edək ki, hazırda Azərbaycanla digər ölkələrin qiymətli kağızlar bazarının tənzimləyiciləri arasında 5 əməkdaşlıq sazişi mövcuddur. Belə ki, Gürcüstanla yanaşı hazırda Türkiyə, Belarus, Qazaxıstan və Ukrayna ilə əməkdaşlıq sazişi qüvvədədir.