Maliyyə

Ana səhifə

Maliyyə

Bakıda Azərbaycan sığorta bazarının problemləri və perspektivlərinə həsr olunmuş konfrans keçirilib

16 mart 2011 10:52 (UTC +04:00)

Bakı. Elnur Hüseynquluyev – APA-Economics. Bu gün Bakıda Azərbaycan Sığortaçılar Assosiasiyası (ASA) və Maliyyə Nazirliyinin təşkilatçılığı ilə «Azərbaycan sığorta bazarı: problemlər və perspektivlər» mövzusunda konfrans keçilib.
«APA-Economics»in məlumatına görə, ASA Direktorlar Şurasının sədri Azər Əliyev konfransın keçirilməsində əsas məqsədin biznes təşkilatlarının rəhbərləri, həmçinin dövlət qurumlarının rəsmilərinin diqqətinə sığorta institutlarının fəaliyyətinin vacibliyini çatdırmaqdır.
A.Əliyev bildirib ki, «Azərbaycan sığorta bazarı: problemlər və perspektivlər» mövzusunda keçirilən konfrans ölkədə sığortanın təbliğinə dair atılan ilk ciddi addım kimi qiymətləndirilir: «Bundan əvvəl sığorta sahəsinə dair digər tədbirlər də keçirilib, lakin bu konfrans birbaşa olaraq sığortaçıların özlərinə istiqamətlənib».
Tədbirdə Milli Məclisin iqtisadi siyasət komitəsinin sədri Ziyad Səmədzadə sığorta sahəsinin inkişafı üçün Azərbaycanın əlverişli investisiya mühiti olan ölkəyə çevrildiyini bildirib. Əhali tərəfindən Azərbaycanda sığorta şirkətlərinə olan inam daha da artıb. Lakin digər sahələrdə olan inkişaf sığorta sektorunda hiss olunmur. Bu sektorun inkişafını sürətləndirmək üçün ilk olaraq əhalini sığorta sahəsi ilə bağlı maarifləndirmək lazımdır. «Mövcud vəziyyətə nəzər salsaq görərik ki, əhalinin maarifləndirilməsi işləri aşağı səviyyədədir. Sığorta biznesinin inkişafı üçün ən vacib məsələlərdən biri cəmiyyətin maarifləndirilməsidir», - deyə millət vəkili bildirib.
Z.Səmədzadənin sözlərinə görə, Azərbaycan üçün illik 200 mln. dollarlıq sığorta haqqının toplanması olduqca azdır: «Çətinliklər mövcuddur, rəqabət aparılır, müştəri cəlb etmək problemi yaranıb. Lakin buna baxmayaraq, sığorta şirkətləri və aidiyyatı qurumlar tərəfindən maarifləndirmə işləri həyata keçirilməlidir».
Tədbirdə Maliyyə Nazirliyi Dövlət Sığorta Nəzarəti Xidmətinin rəisi vəzifəsini icra edən Namiq Xəlilov «Azərbaycanda sığorta qanunvericiliyi və sığorta nəzarəti» mövzusunda geniş təqdimatla çıxış edib.
Qeyd edək ki, konfransda bir sıra sığorta şirkətlərinin nümayəndələri dünyada və Azərbaycanda sığorta sektorunun inkişaf perspektivləri, sığorta məhsulları və sığorta müqavilələri, «İstehsalatda bədbəxt hadisələr və peşə xəstəlikləri nəticəsində əmək qabiliyyətinin itirilməsi hallarından icbari sığorta», ölkədə həyat sığortasının inkişaf perspektivləri, risklərin idarə edilməsi sistemində sığortanın rolu və digər aktual məsələlərlə bağlı çıxışlar ediblər.