Maliyyə

Ana səhifə

Maliyyə

Azərbaycanın fond bazarı qanunvericiliyinin Avropa İttifaqının qanunvericiliyinə uyğunlaşdırılmasına dair ilkin şərtlər toplusunun təqdimatı keçirilib

17 mart 2011 16:32 (UTC +04:00)

Bakı. Nicat Mustafayev - APA-Economics. Bu gün Bakıda «Azərbaycanın qiymətli kağızlar bazarı üzrə qanunvericiliyinin Avropa İttifaqının qanunvericiliyinə uyğunlaşdırılması və institusional inkişaf» tvinninq layihəsinin ilkin şərtlər toplusunun təqdimatı keçirilib.

Azərbaycan Qiymətli Kağızlar üzrə Dövlət Komitəsindən (QKDK) «APA-Economics»ə verilən məlumata görə, təqdimatda normativ-hüquqi sənədlərin Avropa İttifaqının qanunvericiliyinə uyğunlaşdırılması və hazırlanması nəzərdə tutulan yeni qanunvericiliyin tətbiqi ilə əlaqədar geniş məlumat verilib. Tərəflər ilkin şərtlər toplusu ilə bağlı rəylərini bildirib və Avropa Komissiyası tərəfindən cəlb olunmuş mütəxəssislərin Azərbaycana növbəti səfəri çərçivəsində yekun sənədin hazırlanmasında həmin qeydlərin nəzərə alınmasını razılaşdırıb.

Qeyd edək ki, «Azərbaycanın qiymətli kağızlar bazarı üzrə qanunvericiliyinin Avropa İttifaqının qanunvericiliyinə uyğunlaşdırılması və institusional inkişaf» layihəsinin şərtlər toplusunun hazırlanması məqsədilə bu ilin martın 7-18-də Avropa Komissiyası tərəfindən cəlb olunmuş mütəxəssislər Azərbaycanda səfərdə olublar. Səfər çərçivəsində QKDK-nın müvafiq struktur bölmələri və qiymətli kağızlar bazarı institutları və peşəkar iştirakçıları ilə görüşlər keçirilib və qeyd olunan layihənin səmərəliliyini təmin etmək məqsədi ilə məsləhətləşmələr aparılıb.