Maliyyə

Ana səhifə

Maliyyə

Dünya iqtisadiyyatında dolların yerini milli valyutalar səbəti tutacaq

23 mart 2011 09:15 (UTC +04:00)

Bakı. Nicat Mustafayev - APA-Economics. Gələcəkdə dünya iqtisadiyyatında ABŞ dollarının yerini bir sıra ölkələrin milli valyutalarından ibarət olan səbət tutacaq.

«APA-Economics»in «RİA Novosti» agentliyinə istinadən verdiyi məlumata görə, bunu Çinin Beynəlxalq Problemlər İnstitutunun dünya iqtisadiyyatı şöbəsinin rəhbəri Tszyan Çunyue bildirib.

«Yarım əsrdən artıqdır ki, dollar dünyanın əsas valyutasıdır və indiyədək bir çox ölkələr öz milli valyutalarını məhz dollara bağlayır ki, bu da stabil inkişafı təmin edir», - deyə institut rəsmisi bildirib.

T.Çunyuenin sözlərinə görə, hazırda dünyanın qızıl-valyuta ehtiyatlarının 65%-i məhz dollarda saxlanılır və dünya ticarətinin 80%-dən çoxu ABŞ-ın milli valyutasında həyata keçirilir.

Çinli iqtisadçı qeyd edib ki, bu tərzi dəyişmək üçün hər hansı ölkənin iqtisadiyyatı müvafiq səviyyəyə qədər inkişaf etməli və həmin ölkənin valyutası dünya ticarətində geniş istifadə olunmalıdır: «Yaxın gələcəkdə hər hansı valyutanın dünya ticarətində dollar kimi dövriyyə etməsi həddən artıq tezdir. Belə ki, dünya valyutasının islahatı bir çox vaxt tələb edir. Lakin hesab edirəm ki, gələcəkdə dünya iqtisadiyyatında dolların yerini bir sıra ölkələrin milli valyutalarından ibarət olan səbət tutacaq. Səbətə ABŞ dolları ilə yanaşı, Çin yuanı və Yaponiya yeni də daxil ola bilər».