Maliyyə

Ana səhifə

Maliyyə

«Rabitəbank»ın səhmlərinin bir hissəsinin EBRD və IFC-yə satılması prosesi başa çatır

28 mart 2011 15:04 (UTC +04:00)

Bakı. Elnur Hüseynquluyev – APA-Economics. Azərbaycanın «Rabitəbank» ASC-nin səhmlərinin bir hissəsinin Avropa Yenidənqurma və İnkişaf Bankı (EBRD) və Beynəlxalq Maliyyə Korporasiyasına (IFC) satılması prosesi sonuncu mərhələyə çatıb. Bunu «APA-Economics»ə açıqlamasında bankın İdarə Heyətinin sədr müavini Elçin Qədimov bildirib.

E.Qədimovun sözlərinə görə, hazırda səhmlərin alqı-satqısı prosesi tam yekunlaşmayıb, bu istiqamətdə işlər davam etdirilir: «Hazırda texniki sənədləşmə işləri aparılır. Bu prosesin nə vaxt başa çatacağı tarix hələ dəqiq məlum deyil. Çünki bu, birbaşa bankdan asılı olmayan məsələdir, çünki prosesdə iki beynəlxalq maliyyə institutu da iştirak edir».

Qeyd edək ki, ilkin razılaşmaya əsasən, «Rabitabank» səhmlərinin 12,5%-ni IFC-yə 12,5%-ni isə EBRD-yə satacaq. Səhmlərin satılması ilə bağlı əlavə 3,5 mln. manatlıq səhm emissiyası da nəzərdə tutulub. Səhmlərin alqı-satqı prosesi yekunlaşdıqdan sonra bankın nizamnamə kapitalının 35% artaraq 13,5 mln. manata çatacağı gözlənilir. Bankın səhmlərinin qalan hissəsi yerli hüquqi və fiziki şəxslərə məxsusdur.

Xatırladaq ki, «Rabitəbank» ASC 1993-cü ildən fəaliyyət göstərir. Cari ilin yanvar ayının 1-nə bankın aktivləri 121,821 mln. manat, kredit portfeli 85,448 mln. manat, depozit portfeli 102,840 mln. manat, məcmu kapitalı 13,248 mln. manat, o cümlədən nizamnamə kapitalı 10,103 mln. manat təşkil edib. Bankın ölkə üzrə 20 filialı, 28 bankomatı və 138 POS-terminalı mövcuddur.