Maliyyə

Ana səhifə

Maliyyə

Azərbaycanın xidmətlər balansının mənfi saldosu artıb

31 mart 2011 14:47 (UTC +04:00)

Bakı. Vahab Rzayev – APA-Economics. Azərbaycanın 2010-cu il üzrə tədiyə balansında əks etdirilən xarici dövlətlərlə iqtisadi əlaqələrin strukturunda qarşılıqlı xidmətlərin ümumi həcmi 5 862,7 mln. ABŞ dolları təşkil edib. Azərbaycan Mərkəzi Bankından «APA-Economics»ə verilən məlumata görə, bunun 3 797,8 mln. dolları qeyri-rezidentlər tərəfindən Azərbaycanın rezidentlərinə, 2 064,9 mln. dolları isə Azərbaycan rezidentlərinin xarici ölkələrin rezidentlərinə göstərdiyi xidmətlərin dəyəridir.

Beləliklə, xidmətlər balansının saldosu mənfi 1 732,9 mln. dollar olub ki, bu da əvvəlki ilə nisbətən 7,5% çoxdur.

Qarşılıqlı xidmətlər dövriyyəsinin 24,6%-i nəqliyyat xidmətləri üzrə aparılan əməliyyatların payına düşüb. Ümumi dəyəri 1 444,7 mln. dollar olan nəqliyyat xidmətlərinin 800,1 mln. dolları və ya 55,4%-i Azərbaycan rezidentlərinin xarici dövlətlərin nəqliyyat sistemlərindən istifadə etmələri ilə əlaqədar olub. Azərbaycan rezidentlərinin qeyri-rezidentlərə göstərdiyi nəqliyyat xidmətlərinin ümumi dəyəri isə 644,0 mln. təşkil edib. Beləliklə, nəqliyyat xidmətləri üzrə mənfi saldo 156,7 mln. dollar təşkil edib ki, bu da ötən ilə nisbətən 12,4% çoxdur.

Ötən il ərzində xarici ölkə vətəndaşlarına turizmlə bağlı göstərilən xidmətlərin dəyəri 745 mln. dollar məbləğində olub. Öz növbəsində xarici ölkələrdə Azərbaycan rezidentlərinə turizmlə bağlı göstərilən xidmətlərin dəyəri 620,7 mln. dollar olub. Nəticədə, turizm xidmətləri üzrə 124,3 mln. dollar həcmində mənfi saldo yaranıb ki, bu da əvvəlki ilə nisbətən 4,6 dəfə çoxdur.