Maliyyə

Ana səhifə

Maliyyə

Azərbaycan Maliyyə Nazirliyi regionlarda seminar-müşavirələr keçirir

01 aprel 2011 11:29 (UTC +04:00)

Bakı. Nicat Mustafayev - APA-Economics. Azərbaycan Maliyyə Nazirliyinin «Yerli xərclərdən maliyyələşən büdcə və dövlət büdcəsindən maliyyə yardımı alan təşkilatların müvafiq işçilərinə büdcə layihəsinin tərtibi ilə bağlı praktiki köməklik göstərilməsi barədə» müvafiq əmrinin icrasını təmin etmək məqsədilə nazirlik aparatının məsul işçilərindən ibarət işçi qrupu tərəfindən Bakı şəhərində və Şabran rayonunda seminar-müşavirələr keçirilib.

Nazirlikdən «APA-Economics»ə verilən məlumata görə, seminar müşavirədə maliyyə orqanlarının, təhsil, səhiyyə, mədəniyyət və turizm və digər aidiyyəti şöbələrin səlahiyyətli nümayəndələri iştirak edib.

Seminar iştirakçılarına 2012-ci il üzrə dövlət büdcəsinin və icmal büdcənin layihəsi və sonrakı 3 il üçün icmal büdcənin göstəricilərinin, o cümlədən yerli gəlir və xərclərin layihələrinin qanunvericiliklə müəyyən olunmuş müddətdə və keyfiyyətlə hazırlanması məqsədilə «Büdcə layihələrinin tərtibi prosesinə təsir edən mənfi amillər və onların qarşısının alınması yolları», «Rayon və şəhərlərin yerli gəlir və xərclərinin proqnozunun hazırlanması ilə bağlı qüvvədə olan normativ hüquqi aktlar, «Yerli gəlir və xərclərin proqnozunun tərtibi zamanı baş kredit sərəncamçıları ilə maliyyə orqanlarının birgə fəaliyyətinin təşkili», «Rayon və şəhərlərin yerli gəlirinin proqnozlaşdırılması metodologiyası», «Rayon və şəhərlərin yerli xərclərinin proqnozunun tərtibi ilə bağlı xərc normativləri», «İdarəetmə xərclərinin proqnozlaşdırılmasında tətbiq olunan normativ sənədlər və bu istiqamətdə qarşıda duran vəzifələr» və s. mövzularda praktiki yardımlar göstərilib.

Eyni zamanda «Təhsil, səhiyyə və mədəniyyət sahəsində çalışan işçilərin tarifləşmə cədvəlləri», «Mənzil-kommunal təsərrüfatı üzrə abadlaşdırma xərclərinin hesablanması» seminar iştirakçılarına praktiki olaraq nümayiş etdirilib.

Növbəti regional seminar müşavirələr Şəmkir, Gəncə, Qax, Bərdə, Göyçay, Cəlilabad, İmişli və Sabirabad şəhər və rayonlarında keçiriləcək.