Maliyyə

Ana səhifə

Maliyyə

“İcbari sığorta haqqında” qanun layihəsi parlamentdə müzakirə olunub

01 aprel 2011 15:16 (UTC +04:00)

Bakı. Rəşad Süleymanov - APA-Economics. Bu gün Milli Məclisin İqtisadi siyasət və Sosial siyasət komitələrinin birgə iclası keçirilib. “APA-Economics”in məlumatına görə, İqtisadi siyasət komitəsinin sədri Ziyad Səmədzadə iclasda “İcbari sığorta haqqında” qanun layihəsinin ikinci oxunuşda müzakirə olunacağını bildirib.

Z.Səmədzadə Milli Məclisdə ilk oxunuşda müzakirədən keçirilmiş sənədin konseptual baxımdan zəruriliyini vurğulayaraq bildirib ki, qanun icbari sığorta sahəsində yaranan münasibətləri tənzimləyəcək, bu prosesin həyata keçirilməsinin ümumi əsaslarını, ayrı-ayrı icbari sığorta növlərinin aparılması qaydalarını və şərtlərini müəyyən edəcək.

Sosial siyasət komitəsinin sədri Hadı Rəcəbli qeyd edib ki, Azərbaycanda sığorta bazarı xüsusi əhəmiyyət kəsb edilsə də iqtisadiyyatın digər sahələrindən müəyyən qədər geri qalır. İnsanlarının sosial müdafiəsinin gücləndirilməsi, əhalinin sağlamlığının qorunması baxımından qanunun qəbul edilməsinin vacib olduğunu vurğulayan komitə sədri qeyd edib ki, bunun üçün sığorta təşkilatları da fəaliyyətlərini gücləndirməlidir.

Sonra deputatlardan Yaqub Mahmudov, Xanhüseyn Kazımlı, Vahid Əhmədov, Əli Məsimli, İlham Məmmədov, İlham Əliyev, Rauf Əliyev, Cavid Qurbanov, Ayaz Orucov çıxış edərək sənədlə bağlı irad və təkliflərini bildiriblər. Qanunun cəmiyyət üçün əhəmiyyətindən söhbət açan millət vəkilləri bəzi maddələrin yenidən işlənməsinə ehtiyac olduğunu vurğulayıblar. Qeyd olunub ki, xarici ölkələrin bu sahədəki təcrübəsinin yaxından öyrənilməsi, qanunun dilinin sadələşdirilməsi, qiymətləndirmə prosedurlarının asanlaşdırılması məqsədəuyğun olardı.

Ətraflı müzakirələrdən sonra deputatlar qanun layihəsinin daha da təkmilləşdirilərək parlamentin plenar iclasının müzakirəsinə çıxarılması barədə qərar qəbul ediblər.