Maliyyə

Ana səhifə

Maliyyə

Azərbaycan əhalisi nağd dolların satışını artırıb

05 aprel 2011 13:03 (UTC +04:00)

Bakı. Vahab Rzayev – APA-Economics. Azərbaycanda əhali tərəfindən kommersiya bankları vasitəsi ilə nağd ABŞ dollarının satış həcmi 2011-ci ilin yanvar-fevral aylarında 206,5 mln. dollar təşkil edib ki, bu da ötən ilin eyni dövrünə nisbətən 35% çoxdur. Azərbaycan Mərkəzi Bankından «APA-Economics»ə verilən məlumata görə, banklardan alınan nağd dolların həcmi isə həmin müddətdə 877 mln. dollar olub ki, bu da illik müqayisədə 15,8% çoxdur.

«Ekonomist» jurnalının ekspertləri hesab edirlər ki, yaranmış dinamikanın bir neçə səbəbi var ki, bunların bir qismi birbaşa iqtisadiyyatla, digərləri isə əhalinin valyuta bazarında hərəkətləri ilə bağlıdır. Belə ki, 2011-ci ilin əvvəlindən başlayan neftin bahalaşması ölkəyə dollar axınını artırıb, bu da ümumi valyuta bazarına yüksəldici təsir göstərib. Həmin amil ümumiyyətlə iqtisadiyyatda pul axınlarını artıraraq ticarət, daşınmaz əmlak və digər sahələrdə canlanmaya səbəb olub ki, bu da birbaşa olaraq nağd valyuta bazarında dövriyyənin artmasında əksini tapır.

Bundaq başqa, dolların son zamanlar manata qarşı ucuzlaşması da bazara təsir edib, çünki yaranan tendensiya əhali arasında dollara olan etibarını müəyyən dərəcədə azaldıb ki, bu da əhali tərəfindən nağd dolların satışını artırır. Göründüyü kimi, artım ən çox məhz satışda müşahidə olunub ki, bu da əhalinin əvvəllər yığdığı dollar kütləsini tədricən satmasından xəbər verir.