Maliyyə

Ana səhifə

Maliyyə

«Azərbaycan Sənaye Bankı» yeni kampaniyaya başlayıb

08 aprel 2011 07:53 (UTC +04:00)

Bakı. Elnur Hüseynquluyev – APA-Economics. «Azərbaycan Sənaye Bankı» ASC daha öncə bankdan istehlak krediti və ya aktiv kredit kart məhsullarından yararlanmış və ödəniş qrafiki üzrə müsbət tarixçəsi olan müştərilər üçün xüsusi «Təkrar Kredit və Kredit Kart» kampaniyasına başlayıb.
Bankın baş ofisindən «APA-Economics»ə verilən məlumata görə, kampaniya çərçivəsində kreditlər minimum illik 20%-lə (effektiv faiz dərəcəsi - illik 11%) maksimum 24 ayadək təqdim edilir. Bundan başqa, kampaniya daxilində bütün müştərilərə debit kartlar pulsuz, kredit kartı olmayan müştərilərə kredit kartları illik xidmət haqqı standard tarifdən 50% endirimlə, təkrar kredit götürən müştərilərə isə kredit kartları cəmi 10 manat xidmət haqqı ilə təqdim edilir. Kampaniyadan yararlanmaq istəyən müştərilər bu ilin sentyabrın 1-dək bankın filiallarına müraciət edə bilərlər.
Xatırladaq ki, «Azərbaycan Sənaye Bankı» 1996-cı ildə fəaliyyətə başlayıb. Cari ilin aprelin 1-nə bankın aktivlərinin həcmi 189,393 mln. manat, depozit portfeli 131,058 mln. manat, kredit portfeli 97,757 mln. manat, nizamnamə kapitalı 24 mln. manat təşkil edir.
Bankın ölkə üzrə 8 filialı, 32 bankomatı və 299 POS-terminalı mövcuddur. Bankın plastik kartlarından istifadə edən müştərilərinin sayı 18 750-dən, cəmi müştərilərinin sayı isə 31 750-dən çoxdur.