Maliyyə

Ana səhifə

Maliyyə

“DəmirBank” PR sahəsində GUAM ölkələrinin ən yaxşı bankı elan edilib

11 aprel 2011 08:46 (UTC +04:00)

Bakı. Vahab Rzayev - APA-Economics. Azərbaycanın “DəmirBank” ASC “GUAM ölkələrinin ən yaxşı bankı - 2010” müsabiqəsi çərçivəsində “PR sahəsində ən fəal bank” nominasiyası üzrə beynəlxalq mükafata layiq görülüb.

Bankdan “APA-Economics”ə verilən məlumata görə, müsabiqə GUAM Təşkilatının (Gürcüstan, Ukrayna, Azərbaycan və Moldova), Ukraynanın “KBS-İzdat” agentliyinin və “Bankir” jurnalının təşkilatçılığı ilə həyata keçirilib.

Mükafat Ukraynanın paytaxtı Kiyev şəhərində Ukrayna hökuməti və Milli Bankının, həmçinin Kiyevdə müvafiq ölkələrin səfirliklərinin təmsilçilərinin iştirakı ilə keçirilən mərasimdə təqdim edilib.

“DəmirBank”ın 2010-cu ildə PR fəaliyyətinin bir çox nailiyyətləri qeyd edilə bilər. Bankın internet saytı “Azərbaycanın ən yaxşı korporativ saytı” nominasiyasında “NETTY-2010” mükafatına layiq görülüb. “Standard&Poor’s” beynəlxalq reytinq agentliyinin hesabatında “DəmirBank” ölkədə məlumatların açıqlanması və şəffaflıq üzrə aparıcı bank kimi qeyd olunub. GUAM ölkələri məkanında “PR sahəsində ən fəal bank” nominasiyası isə “DəmirBank”ın ictimaiyyətlə əlaqələr üzrə ən fəal mövqelərini təsdiqləyir” - deyə bankın İdarə Heyəti sədrinin müavini Yusif Cabbarov bildirib.

Qeyd edək ki, Azərbaycanın ilk banklarından olan “DəmirBank” (əvvəlki adı “Azərdəmiryolbank”) 1989-cu ildə fəaliyyətə başlayıb. Bankın səhmdarları sırasına beynəlxalq maliyyə təşkilatları olan Avropa Yenidənqurma və İnkişaf Bankı və Hollandiya İnkişaf Maliyyə Şirkəti (FMO) daxildir. “DəmirBank” ölkədə ən geniş filial şəbəkəsinə malik olan banklar sırasındadır. Bankın hazırda 29 filialı fəaliyyət göstərir ki, bunlardan 13-ü Bakı şəhərində, 16-sı isə ölkənin digər regionlarında yerləşir.