Maliyyə

Ana səhifə

Maliyyə

“Hesablama Palatasının 2010-cu ildə fəaliyyəti haqqında hesabat” geniş müzakirə edilib

11 aprel 2011 15:37 (UTC +04:00)

Bakı. Nicat Mustafayev - APA-Economics. Azərbaycan Hesablama Palatasının kollegiya iclasında «Hesablama Palatasının 2010-cu ildə fəaliyyəti haqqında hesabat» geniş müzakirə edilib.

Hesablama Palatasından «APA-Economics»ə verilən məlumata görə, iclasda qeyd olunub ki, hesabatın strukturu «Hesablama Palatasının illik fəaliyyəti barədə hesabatın hazırlanması, baxılması və təsdiq olunması Qaydaları»nın tələblərinə uyğun müəyyənləşdirilib, hesabatda qüvvədə olan qanunvericilik aktlarına uyğun olaraq Palatanın illik fəaliyyətinin nəticələri, o cümlədən 2010-cu ilin İş planında nəzərdə tutulmuş nəzarət tədbirlərinin yekunları, dövlət büdcəsi və Dövlət Sosial Müdafiə Fondunun büdcəsi üzrə müvafiq qanun layihələrinə, dövlət büdcəsinin icrası haqqında qanun layihəsinə hazırlanmış rəylərin xülasəsi, həmçinin Palatanın cari fəaliyyətinin təşkili üzrə görülmüş işlər əks etdirilib.

«Hesabatda əsas diqqət Palatanın nəzarət fəaliyyətinin nəticələrinin, o cümlədən yoxlanılan qurumlarda normativ hüquqi aktların tələblərinin pozulması hallarının, yol verilmiş nöqsan və çatışmazlıqların əks etdirilməsinə yönəldilib, eyni zamanda hər bir nəzarət tədbiri üzrə Palatanın təqdimatına əsasən həmin qurumlar tərəfindən görülmüş işlər və tədbirlər geniş qeyd olunub. Aparılmış maliyyə-büdcə nəzarəti tədbirləri nəticəsində 2010-cu ildə də Palatanın saxlanılmasına sərf edilmiş büdcə vəsaitindən əvvəlki ildə olduğu kimi bir neçə dəfə çox dövlət vəsaitinin büdcəyə bərpa edilməsi, səmərəsiz xərclərin qarşısının alınması və müvafiq qaydada uçota götürülməsi, buraxılmış nöqsan və çatışmazlıqların aradan qaldırılması üçün təxirəsalınmaz tədbirlərin, həmçinin yol verdikləri nöqsan və maliyyə pozuntularına görə aidiyyəti məsul şəxslər barəsində intizam tənbehi tədbirlərinin görülməsinə nail olunması hesabatda xüsusi vurgulanıb», - deyə Hesabat Palatasından bildirilib.

Bundan başqa, Palatanın fəaliyyətinin təşkili üzrə hesabatda bir çox məsələlər, o cümlədən cari fəaliyyətin tənzimlənməsi ilə bağlı görülmüş işlər, hesabat ili üzrə İş planının əsas xüsusiyyətləri, «Hesablama Palatası haqqında» Azərbaycan Respublikası Qanununun 2-ci maddəsinə edilmiş dəyişiklik, normativ-metodiki təminatın gücləndirilməsi məqsədilə beynəlxalq audit standartlarının tələblərinə uyğun hazırlanmış 5 yeni qayda, korrupsiya hüquqpozmalarına şərait yaradan halların aradan qaldırılması istiqamətində Palata tərəfindən həyata keçirilmiş tədbirlər, habelə Palatanın beynəlxalq fəaliyyəti, maliyyə təminatı, daxil olmuş təklif, ərizə və şikayətlərə baxılması məsələləri ətraflı qeyd olunub.

Hesabatın sonunda dövlət büdcəsinin formalaşdırılmasına və dövlət büdcəsindən ayrılan vəsaitlərin təyinatı üzrə istifadə olunmasına, dövlət əmlakının və vəsaitlərinin idarə olunmasına dövlət nəzarətinin gücləndirilməsi, nəzarət mexanizmlərinin təkmilləşdirilməsi, bu sahədə şəffaflığın və hesabatlılığın artırılması, qanunvericilik aktlarında və normativ-metodiki sənədlərdə mövcud olan boşluqların və ziddiyyətlərin aradan qaldırılması məqsədilə Palata tərəfindən Nazirlər Kabinetinə göndərilmiş təklif və tövsiyələr əks etdirilib.

«Hesablama Palatasının 2010-cu ildə fəaliyyəti haqqında hesabat» geniş müzakirə olunaraq təsdiq edilib və Hesabatın Milli Məclisində müzakirə üçün təqdim olunması qərara alınıb.

İclasda həmçinin dövlət büdcəsinin mərkəzləşdirilmiş xərclərindən Azərbaycan Dövlət Tibb Universitetinə ayrılmış vəsaitlərin və büdcədənkənar daxilolmaların proqnozlaşdırılmasının əsaslılığı, tərtibi və icrasının və «Təhsil» bölməsi üzrə Təhsil Nazirliyinə Dövlət proqram və tədbirlərinə ayrılan dövlət vəsaitlərinin proqnozlaşdırılması və istifadəsi üzrə keçirilmiş audit tədbirlərinin nəticələrinə dair hesabat və rəylər müzakirə olunaraq təsdiq edilib.