Maliyyə

Ana səhifə

Maliyyə

Azərbaycanda yeni icbari sığorta növü ilə bağlı müsabiqə keçirilir

12 aprel 2011 06:59 (UTC +04:00)

Bakı. Elnur Hüseynquluyev – APA-Economics. Azərbaycan Maliyyə Nazirliyinin Dövlət Sığorta Nəzarəti Xidməti «İstehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi hallarından icbari sığorta» növünün təbliği sahəsində ən yaxşı videoçarx ssenari mətninin təqdim olunması ilə bağlı müsabiqə elan edib.

Xidmətdən «APA-Economics»ə verilən məlumata görə, müsabiqənin keçirilməsində əsas məqsəd işçilərin və işəgötürənlərin məlumatlandırılması və bu işə ictimaiyyət üzvlərinin də cəlb edilməsinin təmin olunmasıdır.

Müsabiqədə istehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi hallarından icbari sığorta növü ilə bağlı videoçarx üçün ssenari mətni yazmaq istəyən hər bir şəxs iştirak edə bilər.

Müsabiqənin əsas şərtlərinə görə, təqdim olunan ssenari mətni istehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi hallarından icbari sığorta qanunvericiliyinə uyğun olmalı, ssenari mətni 30 saniyəlik video çarx qısa və lakonik olmalı, həmçinin ssenari mətnində personajlar, əsas süjet xətti və dialoqlar aydın şəkildə göstərilməlidir.

Ssenari mətnləri mayın 11-dək rəsmi müraciətlə Bakı şəhəri, C.Məmmədquluzadə küçəsi,71 ünvanı üzrə təqdim olunmalıdır.

Qeyd edək ki, müsabiqədə I yerin qalibinə 500 manat, II yerin qalibinə 300 manat və sonuncu yerin qalibinə 200 manat pul mükafatı təqdim olunacaq.