Maliyyə

Ana səhifə

Maliyyə

Azərbaycan dövlət investisiya xərclərinə I rübdə 546 mln. manat xərcləyib

13 aprel 2011 08:08 (UTC +04:00)

Bakı. Nicat Mustafayev – APA-Economics. Bu ilin I rübü ərzində Azərbaycan dövlət büdcəsindən dövlət investisiya xərclərinə 546 mln. manat vəsait yönəldilib ki, əsas investisiya layihələrinin maliyyələşdirilməsi təmin edilib. «APA-Economics»in məlumatına görə, bunu Nazirlər Kabinetinin 2011-ci ilin I rübünün sosial-iqtisadi inkişafının yekunlarına həsr olunmuş iclasında çıxış edən maliyyə naziri Samir Şərifov bildirib.

Onun sözlərinə görə, həmin vəsaitdən 78 mln. manat təhsil, səhiyyə, mədəniyyət, idman və digər sosial-mədəni və məişət təyinatlı obyektlərin tikintisinə və yenidən qurulmasına xərclənib: «Müharibə əlilləri, şəhid ailələri üçün yaşayış evləri və bu qəbildən olan digər sosial obyektlərin tikintisinə 9,4 mln. manat, regionlarda idman kompleksləri və digər idman təyinatlı obyektlərin tikintisi və yenidən qurulmasına 5,5 mln. manat vəsait yönəldilib».

Nazir onu da qeyd edib ki, ölkənin əsas enerji, su təchizatı, qaz, nəqliyyat, kommunal, meliorasiya infrastrukturlarının tikintisi və yenidən qurulması üçün 363 mln. manat, o cümlədən yol-nəqliyyat infrastrukturunun tikintisi və yenidən qurulması üçün 144 mln. manat, Bakı Metropoliteninin stansiyalarında tikinti və yenidənqurma işlərinə 24 mln. manat, «Bakıelektrikşəbəkə» ASC-nin nizamnamə kapitalının artırılmasına 17 mln. manat, regionların içməli su və suvarma-drenaj infrastrukturunun bərpasına 10 mln. manat, Azərbaycanda kosmik sənayenin yaradılması və inkişafı üzrə Dövlət Proqramının icrasına 20 mln. manat, «Azərbaycan Hava Yolları» QSC-yə 143 mln. manat, digər dövlət əhəmiyyətli tədbirlərin maliyyələşdirilməsinə isə 5 mln. manat vəsait sərf edilib.

«Dövlət büdcəsindən ayrılmış investisiya xərcləri ilə yanaşı, ölkəmizdə yol, su təchizatı və meliorasiya, kənd təsərrüfatı, sosial və digər infrastrukturların tikintisi və yenidən qurulması üçün Azərbaycan tərəfindən xaricdən 206 mln. manat məbləğində vəsait cəlb olunub», - deyə nazir vurğulayıb.

Bununla yanaşı, 2011-ci ilin I rübündə Azərbaycan Prezidentinin Ehtiyat Fondundan həlli vacib hesab edilən bir sıra sosial və infrastruktur layihələrin həyata keçirilməsi, abadlıq və quruculuq işlərinin davam etdirilməsi üçün 31 mln. manat vəsaitin ayrılmasına dair ölkə prezidenti tərəfindən müvafiq sərəncamlar imzalanıb: «Hesabat dövründə dövlət büdcəsinin Ehtiyat Fondundan büdcədə əvvəlcədən nəzərdə tutulmayan bir sıra dövlət əhəmiyyətli tədbirlərin maliyyələşdirilməsinə 14,3 mln. manat vəsait ayrılıb, ondan 7 mln. manat artıq istifadə olunub».