Maliyyə

Ana səhifə

Maliyyə

Azərbaycan dövlət büdcəsinin mədaxil hissəsi I rübdə 13% artıb

13 aprel 2011 08:28 (UTC +04:00)

Bakı. Nicat Mustafayev – APA-Economics. Bu ilin I rübündə Azərbaycanın dövlət büdcəsinin mədaxil üzrə proqnozu 118% səviyyəsində icra olunub və faktiki olaraq 2,768 mlrd. manat təşkil edib. Bu isə ötən ilin eyni dövrü ilə müqayisədə 13,2% çoxdur. «APA-Economics»in məlumatına görə, bunu Nazirlər Kabinetinin 2011-ci ilin I rübünün sosial-iqtisadi inkişafının yekunlarına həsr olunmuş iclasında çıxış edən maliyyə naziri Samir Şərifov bildirib.

Onun sözlərinə görə, hesabat dövründə Vergilər Nazirliyi büdcəyə 1,161 mln. manat, ötən ilin eyni dövrünə nisbətən 151 mln. manat və ya 15% çox vəsaitin daxil olmasını təmin edib: «Bu vəsaitin 58,7%-i və ya 681 mln. manatı qeyri-neft sektorundan daxilolmaların payına düşür ki, bu da 2010-cu ilin müvafiq dövrünə nisbətən 132 mln. manat və yaxud 24% çoxdur».

S.Şərifov qeyd edib ki, qeyri-dövlət sektorunda iqtisadi fəallığın artması və iqtisadiyyatın şaxələndirilməsi tədbirlərinin real nəticəsi kimi bu sektor üzrə daxilolmaların həcmi 2010-cu ilin müvafiq dövrünə nisbətən 20,9%, vergi daxilolmalarında xüsusi çəkisi isə 67,6%-dən 71,1%-ə çatıb.

«Dövlət Gömrük Komitəsi tərəfindən proqnoza 100,2% əməl olunmaqla büdcəyə 241 mln. manatın daxil olması təmin edilib ki, bu da ötən ilin eyni dövrü ilə müqayisədə 17,1% çoxdur. Eyni zamanda, Dövlət Neft Fondundan büdcəyə 1,330 mlrd. manat vəsait transfert edilib», - deyə nazir bildirib.

Bundan başqa S.Şərifov qeyd edib ki, hesabat dövründə sair daxilolmalar üzrə büdcəyə 36 mln. manat vəsait təmin edilib, bu da ötən ilin eyni dövrü ilə müqayisədə 32 mln. manat çoxdur.

Eyni zamanda, yanvar-mart aylarında dövlət büdcəsinin xərcləri proqnoza nisbətən 87,3% və ya 2,087 mln. manat, ötən ilin eyni dövrü ilə müqayisədə isə 108 mln. manat və ya 5,5% çox icra olunub.

Nazirin sözlərinə görə, iqtisadi təsnifata uyğun olaraq I rübdə dövlət büdcəsinə daxil olan vəsaitin 47,9%-i və ya 1 mlrd. manatı sosial təyinatlı xərclərin maliyyələşdirilməsinə yönəldilib ki, bu da ötən ilin eyni dövrü ilə müqayisədə 129 mln. manat və ya 14,9% çoxdur: «Ötən ilin eyni dövrü ilə müqayisədə cari ilin I rübündə sosial təyinatlı xərclərə aid olan təqaüdlər və sosial müavinətlərin ödənişinə 17,2% və ya 57 mln. manat çox, əməyin ödənişi fonduna 14,2% və ya 70 mln. manat çox, ərzaq və dərman xərclərinə 3,8% və ya 1,6 mln. manat çox vəsait sərf edilib».

S.Şərifov qeyd edib ki, hesabat dövründə həmçinin, məcburi köçkünlərə, müavinət və yardım alan vətəndaşlara nəzərdə tutulan ödənişlər üzrə öhdəliklərin icrası tam təmin edilib, növbəti rüblər hesabına ayrılan vəsait də nəzərə alınmaqla I rübdə sosial müdafiə və sosial təminat xərclərinə 408 mln. manat və ya 2010-cu ilin eyni dövrü ilə müqayisədə 19,2% çox vəsait ayrılıb.

«Funksional təsnifata uyğun olaraq hesabat dövründə ötən ilin eyni dövrü ilə müqayisədə müdafiə xərclərinə 21,9%, səhiyyə xərclərinə 21,8%, kənd təsərrüfatı, meşə təsərrüfatı və balıqçılıq xərclərinə 18,3%, təhsil xərclərinə 12,4%, mədəniyyət, incəsənət, informasiya və bədən tərbiyəsi xərclərinə 11,9% çox vəsait yönəldilib», - deyə S.Şərivo vurğulayıb.

Hesabat dövründə həmçinin, dövlətin xarici və daxili borclarının ödənilməsi üçün büdcədən 154 mln. manat vəsait yönəldilib.

Azərbaycanın xaricdə olan diplomatik nümayəndəliklərinin fəaliyyəti üçün dövlət büdcəsindən 15 mln. manat, ölkədə keçirilmiş bir sıra beynəlxalq və respublika səviyyəli tədbirlərin maliyyələşdirilməsinə isə 3,5 mln. manat vəsait yönəldilib.

Bundan başqa, «2008-2015-ci illərdə Azərbaycanda əhalinin ərzaq məhsulları ilə etibarlı təminatına dair Dövlət Proqramı»nın icrası üçün büdcədən 25 mln. manat vəsait yönəldilib.