Maliyyə

Ana səhifə

Maliyyə

«Texnika Leasing» bu ilin I rübündə mənfəətini 2,5 dəfə artırıb

19 aprel 2011 10:16 (UTC +04:00)

Bakı. Elnur Hüseynquluyev – APA-Economics. Azərbaycanın «Texnika Leasing» QSC-nin lizinq portfelinin həcmi 2011-ci ilin aprelin 1-nə 3,352 mln. manat təşkil edib ki, bu da ötən ilin analoji dövrünün göstəricisi ilə müqayisədə 1,8% çoxdur.

Şirkətin baş mühasibi Bilal Ruhullazadənin «APA-Economics»ə verdiyi məlumata görə, hesabat dövründə şirkətin lizinq müqavilələrinin sayı 17% azalaraq 20-yə, indiyədək lizinqə verilən avadanlıqların dəyəri isə 5,9% azalaraq 2,960 mln. manata, nizamnamə kapitalının həcmi isə 2,4 dəfə artaraq 6 mln. manata çatıb.

Qeyd olunan dövr ərzində şirkətin ümumi gəlirləri 52% azalaraq 29,530 min manat, xərcləri isə 6 dəfə azalaraq 8,757 min manat təşkil edib. Nəticədə, şirkətin mənfəəti son bir ildə 2,5 dəfə artaraq 20,773 min manat olub.

Lizinq portfelinin sahələr üzrə bölgüsündə portfelin 75%-ni xüsusi təyinatlı tikinti texnikası, 20%-ni minik avtomobilləri, 5%-ni isə digər sahələr təşkil edib.

Xatırladaq ki, «Texnika Leasing» şirkəti 2006-cı ildən fəaliyyət göstərir. Şirkət tərəfindən lizinq avadanlıqları illik 18-19% olmaqla, 6-24 ay müddətinə verilir. Lizinq avadanlıqlarının minimum dəyəri 20 min manat, ilkin ödəniş isə 20-25% olmalıdır. Şirkətin fəaliyyət dairəsi yalnız Abşeron iqtisadi rayonunu əhatə edir.