Maliyyə

Ana səhifə

Maliyyə

«Bank Respublika» AYİB-in mükafatına layiq görülüb

07 iyun 2011 13:15 (UTC +04:00)

Bakı. Elnur Hüseynquluyev – APA-Economics. Avropa Yenidənqurma və İnkişaf Bankı (AYİB) 2010-cu ilin nəticələrinə görə «Bank Respublika» ASC-ni «Azərbaycanda ticarətin maliyyələşdirilməsi üzrə ən fəal bank» mükafatına layiq görüb.

Bankın baş ofisindən «APA-Economics»ə verilən məlumata görə, həmin mükafat banka artıq 3-cü ildir verilir: «Bu, banka beynəlxalq maliyyə təşkilatları tərəfindən böyük etibarın və ticarətin maliyyələşdirilməsi istiqamətində aparılan aktiv fəaliyyətin sübutu kimi qiymətləndirilə bilər».
Xatırladaq ki, «Bank Respublika» ASC 2004-cü ildən AYİB tərəfindən reallaşdırılan «Beynəlxalq Ticarətə Dəstək Proqramı»nın fəal iştirakçısıdır.

Həmin proqram MDB-də, həmçinin Mərkəzi və Şərqi Avropa ölkələrində ticarətə dəstək məqsədilə yaradılıb. Eyni zamanda, beynəlxalq əməkdaşlıq proqramları üzrə müxtəlif xarici maliyyə təşkilatları tərəfindən «Bank Respublika» üçün 290 mln. ABŞ dollarından çox məbləğdə kredit xətləri açılıb və bu, daha sərfəli şərtlərlə müştərilərə uzunmüddətli kreditlər və ticarətin maliyyələşdirilməsi üzrə xidmətlər təqdim etmək üçün bankın imkanlarını genişləndirib.

«Bank Respublika» ASC 1992-ci ildən fəaliyyət göstərir. Bankın səhmdarları sırasında səhmdar kapitalında «25%+1 səhm» paketinə sahib olan Almaniyanın DEG İnvestisiya Şirkəti və «Sparkassen International Development Trust» təşkilatı var.