Maliyyə

Maliyyə

Azərbaycanın Maliyyə Monitorinqi Xidməti Eqmont Qrupunun üzvlüyünə qəbul edilib

18 iyul 2011 10:18 (UTC +04:00)

Bakı. Vahab Rzayev - APA-Economics. Maliyyə monitorinq orqanlarının Eqmont Qrupunun 19-cu Plenar iclasında Azərbaycan Mərkəzi Bankı yanında Maliyyə Monitorinqi Xidməti (MMX) Eqmont Qrupunun tamhüquqlu üzvü seçilmişdir.

MMX-dən “APA-Economics”ə verilən məlumata görə, Eqmont Qrupuna üzvlüklə bağlı Maliyyə Monitorinqi Xidməti tərəfindən 2009-cu ildə müraciət edilmiş və bu müraciət əsasında müvafiq prosedurlara başlanılıb.

Bu prosedurlar çərçivəsində Eqmont Qrupunun İşçi Alt-Qruplarının ötən dövr ərzində keçirilmiş iclaslarında MMX tərəfindən təqdimatlar keçirilib. Bu təqdimatlarda Azərbaycanın cinayət yolu ilə əldə edilmiş pul vəsaitlərinin və ya digər əmlakın leqallaşdırılmasına və terrorçuluğun maliyyələşdirilməsinə mübarizə (PL/TMM) sahəsində nailiyyətləri və MMX-nin fəaliyyəti haqqında ətraflı məlumat verilmiş və bununla əlaqədar müzakirələr keçirilib. Eyni zamanda Azərbaycanda PL/TMM sisteminin inkişafı sahəsində mövcud vəziyyətlə bağlı Eqmont Qrupu tərəfindən Maliyyə Monitorinqi Xidmətinə ünvanlanan qiymətləndirmə sorğuları aidiyyəti üzrə cavablandırılıb. Bu ilin mart ayında keçirilmiş İşçi Alt-Qruplarının iclasında Azərbaycanın PL/TMM sisteminin, o cümlədən milli qanunvericiliyin və MMX-nin fəaliyyətinin beynəlxalq standartlara uyğunluğu nəzərə alınaraq, xidmətin Eqmont Qrupunun üzvlüyünə qəbul edilməsi ilə əlaqədar təşkilatın Hüquq və İnteqrasiya İşçi Alt-Qrupları tərəfindən müsbət rəy bildirilib.

MMX-nin üzvlüyə qəbulu prosesində Eqmont Qrupu tərəfindən müəyyən edilmiş “sponsor” (dəstəkləyici) dövlətlər kimi Rusiya Federasiyası və Ukrayna çıxış edib.

Maliyyə kəşfiyyatı orqanları arasında əməkdaşlığı inkişaf etdirmək məqsədilə yaradılan Eqmont Qrupunun əsası 1995-ci ildə qoyulub. Eqmont Qrupunun əsas məqsədi ilkin inkişaf mərhələsində olan maliyyə monitorinqi orqanlarının təşkilinə və institusional potensialının formalaşmasına yardım göstərilməsi, PL/TMM sahəsində beynəlxalq əməkdaşlığın genişləndirilməsi, qarşılıqlı məlumat mübadiləsinin həyata keçirilməsi, maliyyə monitorinqi orqanlarının əməkdaşlarının təcrübə və peşəkarlıq səviyyəsinin artırılması məqsədilə təlimlərin keçirilməsindən ibarətdir. Eqmont Qrupuna üzvlük Maliyyə Monitorinqi Xidmətinin beynəlxalq əməkdaşlıq coğrafiyasının genişləndirilməsi və ikitərəfli əməkdaşlığın inkişaf etdirilməsi baxımından mühüm əhəmiyyət kəsb edir.