Maliyyə

Maliyyə

«İpək Yolu Sığorta» şirkəti bu ilin I yarısında 7 mln. manata yaxın sığorta haqqı toplayıb

21 iyul 2011 14:18 (UTC +04:00)

Bakı. Elnur Hüseynquluyev - APA-Economics. Azərbaycanın aparıcı sığorta şirkətlərindən olan «İpək Yolu Sığorta» şirkətinin (əvvəlki «Azal Sığorta») 2011-ci il yanvar-iyun aylarında topladığı sığorta haqlarının həcmi 6 544,23 min manata çatıb.

Şirkətin baş ofisindən «APA-Economics»ə verilən məlumata görə, hesabat dövründə «Hava nəqliyyatı vasitələrinin sığortası» növü üzrə 4 028,41 min manat, «Hava nəqliyyatı vasitələri sahiblərinin mülki məsuliyyətinin sığortası» üzrə 1 526,87 min manat, «Əmlakın yanğından və digər risklərdən sığortası» üzrə 407 088 manat, «Ümumi mülki məsuliyyətin sığortası» üzrə 331 030 manat, «Sərnişinlərin icbari sığortası» üzrə 76 794 manat, «Fərdi qəza və xəstəlik sığortası» üzrə 29 315 manat, «Əmlakın yanğından icbari sığortası» üzrə 15 146 manat, «Yüklərin (nəqliyyat) sığortası» üzrə 12 670 manat, «Avtonəqliyyat vasitəsi sahiblərinin mülki məsuliyyətinin sığortası» üzrə 11 771 manat və «Kreditlərin sığortası» növü üzrə isə 3 886 manat həcmində sığorta haqqı toplanılıb.

Yuxarıda qeyd olunan növlərin məcmu sığorta haqlarında xüsusi çəkisi isə müvafiq olaraq 62%, 23,30%, 6,22%, 5,06%, 1,17%, 0,45%, 0,23%, 0,19%, 0,18% və 0,06% təşkil edib.

Hesabat dövründə şirkət könüllü sığorta növlərindən 6 452,29 min manat, icbari sığorta növlərindən 91 940 manat sığorta haqqı yığıb. Ödənişlərə gəldikdə isə qeyd olunan dövrdə şirkətin sığorta hadisələri üzrə ödədiyi vəsaitlərin həcmi 2 863,80 min manata çatıb. Burada ən çox vəsait «Hava nəqliyyatı vasitələrinin sığortası» (2 841,71 min manat və ya 99%), «Avtonəqliyyat vasitələrinin sığortası» (12 876 manat və ya 0,5%) və «Avtonəqliyyat vasitəsi sahiblərinin mülki məsuliyyətinin sığortası» (8 154 min manat və ya 0,3%) növləri üzrə ödənilib.

Qeyd edək ki, bu ilin 6 ayı ərzində şirkət tərəfindən icbari sığorta növləri üzrə ödənilən vəsaitlərin həcmi sıfıra bərabər olub. Bütün ödənişlər könüllü sığorta növləri üzrə həyata keçirilib.

Xatırladaq ki, təsisçisi «Azərbaycan Hava Yolları» QSC olan «İpək Yolu Sığorta» şirkəti 1995-ci ildən «Azal Sığorta» kimi fəaliyyət göstərib. Hazırda şirkətin nizamnamə kapitalı 8,855 mln. manat təşkil edir. Şirkət hazırda 23 sığorta növü ilə məşğul olmaq üçün müvafiq lisenziyalara malikdir.