Maliyyə

Maliyyə

«Meqa Sığorta» şirkəti 117 min manat sığorta haqqı toplayıb

25 iyul 2011 10:57 (UTC +04:00)

Bakı. Elnur Hüseynquluyev - APA-Economics. Azərbaycanın «Meqa Sığorta» şirkətinin 2011-ci ilin yanvar-iyun aylarında topladığı sığorta haqlarının həcmi 117 min manata çatıb.

Şirkətin baş ofisindən «APA-Economics»ə verilən məlumata görə, hesabat dövründə ən çox sığorta haqqı «Avtonəqliyyat vasitələrinin sığortası» (93,054 min manat), yüklərin (nəqliyyat) sığortası (8,074 min manat), «Əmlakın yanğından və digər risklərdən sığortası» (5,692 min manat) və «Nəqliyyat vasitələrinin mülki məsuliyyətinin icbari sığortası» (1,547 min manat) növləri üzrə toplanılıb.

Dövr ərzində şirkətin sığorta hadisələri üzrə ödənişləri 17,806 min manat olub. O cümlədən bu dövr ərzində şirkət «Avtonəqliyyat vasitələrinin sığortası» növü üzrə 17,296 min manat vəsait ödəyib.

Qeyd edək ki, bu dövr ərzində könüllü sığorta növləri üzrə 114,077 min manat, icbari sığorta növləri üzrə isə 2,967 min manat sığorta haqqı toplanılıb. Ödənişlərdə 17,296 min manat könüllü sığorta növləri, 510 manat isə icbari sığorta növlərinə ödənilib.

Xatırladaq ki, təsisçisi iki yerli fiziki şəxs olan «Meqa Sığorta» şirkəti 1998-ci ildən «Naxçıvan Sığorta» şirkəti kimi fəaliyyətə başlayıb. Lakin 2001-ci ildə şirkətin brendi «BE&G», 2010-cu ilin oktyabr ayından isə «Meqa Sığorta»ya dəyişdirilib. Şirkət müştərilərə 23 könüllü və 4 icbari sığorta növü üzrə xidmət göstərir.