Maliyyə

Maliyyə

Azərbaycan Qiymətli Kağızlar üzrə Dövlət Komitəsinin geniş kollegiya iclası keçirilib

28 iyul 2011 10:00 (UTC +04:00)

Bakı. Nicat Mustafayev - APA-Economics. Azərbaycan Qiymətli Kağızlar üzrə Dövlət Komitəsinin (QKDK) 2011-ci ilin 6 ayı üzrə fəaliyyətinin yekunlarına həsr olunmuş geniş kollegiya iclası keçirilib.

Komitədən «APA-Economics»ə verilən məlumata görə, iclas zamanı QKDK-nın sədri Rüfət Aslanlı cari ilin ilk yarısında dünya iqtisadiyyatında müşahidə olunan əsas meyllərdən bəhs edərək, qlobal iqtisadiyyatın inkişafında səngimə əlamətlərinin müşahidə edilməsi, dünyanın aparıcı iqtisadiyyatlarının fiskal sabitlik və borc problemlərinin aktuallaşması, artımın coğrafi qeyri bərabərliyinin yeni risk və təhdidləri gündəmə çıxartması barədə danışıb.

Qlobal iqtisadiyyatdakı bu meyllər fonunda Azərbaycan iqtisadiyyatında artımın və sosial inkişafın davam etdiyini bildirən R.Aslanlı bu uğurların iqtisadi şaxələndirmə siyasətinin müsbət nəticəsi olduğunu bildirib. QKDK sədri ölkədə investisiya qoyuluşlarının artdığını, xarici iqtisadi mövqelərin gücləndiyini, sosial sferada müsbət dinamikanın cari ilin 6 ayı ərzində də davam etdiyini vurğulayıb və bildirib ki, hesabat dövründə qiymətli kağızlar bazarında da artım müşahidə olunub. Belə ki, dövlət qiymətli kağızlar bazarı 5,1 dəfə, korporativ qiymətli kağızlar bazarı isə 1,5 dəfə artıb.

R.Aslanlı «2011-2020-ci illərdə Azərbaycanda qiymətli kağızlar bazarının inkişafı» Dövlət Proqramının önəminə də toxunaraq bu Proqramın beynəlxalq standartlara uyğun, effektiv fəaliyyət göstərən və optimal tənzimlənən qiymətli kağızlar bazarının formalaşdırılmasını hədəflədiyini bildirib.

İclas zamanı həmçinin QKDK sədrinin müavinləri və struktur bölmə rəhbərləri geniş məruzələrlə çıxış edərək, hesabat dövrü ərzində həyata keçirilən tədbirlər və strateji fəaliyyət planlarının icra vəziyyəti barədə ətraflı məlumat veriblər. Məruzələrdə QKDK-nın cari funksional fəaliyyətinin yekunları ilə yanaşı, hesabat dövründə qiymətli kağızlar bazarının normativ-hüquqi bazasının təkmilləşdirilməsi, səhmdarların hüquqlarının qorunması, QKDK və bütövlükdə bazar iştirakçılarının potensialının gücləndirilməsi, eləcə də beynəlxalq əməkdaşlığın genişləndirilməsi istiqamətində həyata keçirilən tədbirlər barədə məlumat verilib. Əlavə olaraq qeyd edilib ki, hesabat dövründə bazara yeni xüsusiyyətli alətlər - konvertasiya edilən istiqrazlar çıxarılıb, korporativ istiqrazlarla repo əməliyyatlarının aparılmasını təmin edən hüquqi və institusional baza formalaşdırılıb, qiymətli kağızlarla ticarət və onların depozitar uçotu sistemləri beynəlxalq təcrübəyə uyğunlaşdırılıb.

İclasın sonunda R.Aslanlı cari ilin 6 ayını bütövlükdə Komitə üçün məhsuldar dövr kimi qiymətləndirərək, ilin qalan dövrü ərzində sözügedən Dövlət Proqramının icrası proseslərinin effektiv əlaqələndirilməsi və işlərin sürətləndirilməsini, «Qiymətli kağızlar bazarı haqqında» yeni qanun üzərində işlərin tamamlanaraq layihənin təqdim olunmasını və bütövlükdə qanunvericiliyin qabaqcıl standartlara uyğunlaşdırılmasının əsasən tamamlanmasını, qiymətli kağızlar bazarında ticarət və post-ticarət proseslərinin birbaşa emal prinsipləri əsasında qurulması işlərinin yekunlaşdırılması və ödəniş sistemlərinə inteqrasiya olunmasını QKDK-nın qarşısında duran prioritet vəzifələr kimi qeyd edib. Bazarın tənzimlənməsi metod və vasitələrinin qabaqcıl standartlar əsasında təkmilləşdirilməsi, maliyyə sabitliyinin təmin olunması məqsədilə sistem xarakterli risklərin aşkarlanması və idarəolunması mexanizmlərinin yaradılması, beynəlxalq əməkdaşlığın genişləndirilməsi və texniki yardımlardan səmərəli istifadə edilməsi üzrə konkret tapşırıqlar verən R.Aslanlı 2011-ci ilin Komitə üçün «potensialın genişləndirilməsi və inkişaf etdirilməsi ili» olduğunu iclas iştirakçılarına xatırladaraq bu istiqamətdə nəzərdə tutulan tədbirlərin cari ilin sonunadək yekunlaşdırılmasını tapşırıb.