Maliyyə

Maliyyə

Rusiya bu ilin sonuna qədər ÜTT-yə üzv ola bilər

29 iyul 2011 08:43 (UTC +04:00)

Bakı - APA-Economics. Rusiyanın Ümumdünya Ticarət Təşkilatına (ÜTT) üzvlüyü bu ilin sonuna qədər tam həllini tapa bilər.

“APA-Economics”in xəbərinə görə, Rusiya nümayəndə heyətinin rəhbəri Maksim Medvedkov bildirib ki, danışıqlar və bütün formal prosedurlar bu ilin dekabr ayının ortalarına - ÜTT Ali Şurasının toplantısına qədər başa çatdırıla bilər.

Məsələ Rusiyanın baş naziri Vladimir Putinlə Avropa Komissiyasının sədri Joze Manuel Barrozunun dünənki telefon danışığında da müzakirə olunub. V.Putin Avropa İttifaqını prosesin sürətləndirilməsinə təsir etməyə çağırıb.

ÜTT-nin baş direktoru Paskal Lami də “Reuters”ə açıqlamasında Rusiyanın təşkilata üzvlüyünün ilin sonunadək həll oluna biləcəyini bildirib.

Qeyd edək ki, beynəlxalq ticarətin liberallaşdırılması və üzv ölkələrin siyasi-ticari münasibətlərinin tənzimlənməsi üçün yaradılan ÜTT hazırda 153 ölkəni özündə birləşdirir. Rusiyanın ÜTT-yə üzvlüyü üçün onların hər birinin razılığı tələb olunur. Bu səbəbdən Gürcüstanın vetosu Rusiyanın ÜTT-yə üzvlüyünü əngəlləyir. Rəsmi Tiflisin irəli sürdüyü əsas şərt isə Gürcüstanın tanınmamış Cənubi Osetiya və Abxaziya respublikalarında gömrük məntəqələrinə tam nəzarətə sahib olmaqdan ibarətdir. Moskva bu şərtə razılıq verməyəcəyi müddətdə Gürcüstan da Rusiyanın Ümumdünya Ticarət Təşkilatına üzvlüyünə maneələr yaradacaq.

Adətən, hansısa ölkənin ÜTT-yə üzvlüyü ilə bağlı danışıqlar 5-7 il çəksə də, Rusiya bu sahədə rekord göstəriciyə imza atıb - 17 il. Hazırda Rusiya bu beynəlxalq təşkilata üzv olmayan yeganə nəhəng iqtisadiyyatlı ölkədir.