Maliyyə

Maliyyə

«Deloit & Touch CIS» şirkəti «ABB-Moskva» bankının maliyyə hesabatını təsdiqləyib

03 avqust 2011 09:31 (UTC +04:00)

Bakı. Əli Əhmədov – APA-Economics. Dünyanın ən böyük və nüfuzlu auditor şirkətlərindən biri olan «Deloit & Touch CIS» təşkilatı «Azərbaycan Beynəlxalq Bankı-Moskva» bankının («ABB-Moskva») 2010-cu il üzrə beynəlxalq maliyyə hesabatlılığı əsasında tərtib edilmiş maliyyə hesabatını təsdiqləyib.

Bankdan «APA-Economics»ə verilən məlumata görə, 2010-cu ildə «ABB-Moskva» bankının bütün maliyyə göstəriciləri yaxşılaşıb. Maliyyə hesabatına əsasən, 2010-cu ildə Bankın aktivləri 3 479,6 mln. rubl və ya 24,4% artaraq ilin axırında 17 767,8 mln. rubl olub. Bu göstəricilər «ABB-Moskva»nın şaxələnmiş biznes modelinin qurulması üçün apardığı məqsədyönlü siyasətinin nəticəsidir – bunun sayəsində ayrı-ayrı müştəri və ya müştəri qruplarından və ya onların fəaliyyət sahəsindən asılılıq riski maksimum azalır.

Hesabat ilin bankın xalis aktivləri isə 1 123,9 mln. rubla çatdırılıb.

Bazarın korporativ seqmentinə istiqamətlənməsi və biznesin aktiv inkişafı banka kreditlərin həcmini artırmağa imkan verib. Keçən il bankın kredit portfeli 24,5% artaraq 11 824,9 mln. rubla çatıb, onun ümumi aktivlərdə payı 66,5% təşkil edib. Kredit portfelində hüquqi şəxs olan müştərilərin payı 90%-dir.

Hesabat dövrü ərzində «ABB-Moskva»nın müştərilərinin artım dinamikası da yaxşı olub ki, bu da onların banka inamının göstəricisidir. Auditor rəyinə əsasən, müştərilərin hesablarındakı vəsaitlər 31,9% artaraq ilin sonunda 5 119,1 mln. rubl təşkil edib. Bankın hesablarında korporativ müştərilərin pul vəsaitlərinin həcmi 2 927 mln. rubl (ötən illə müqayisədə 6,5% artıb), pərakəndə müştərilərin pul vəsaitləri isə 2 192 mln. rubl (93,2% artım) təşkil edib.

Ötən il ərzində bankın faiz gəlirləri 51,8% artaraq 1 899,1 mln. rubl, qeyri-faiz gəlirləri isə 32% artaraq 198 mln. rubla çatıb. Gəlirlərin strukturu bankın kredit əməliyyatlarına yönəldiyini göstərir. Eyni zamanda, bank daima faiz və komission gəlirlərinin balanslaşdırılmasına çalışır. Keçən il bankın təmiz mənfəəti 53,2% artaraq 54,7 mln. rubla (vergitutmaya qədər – 106,7 mln. rubl) çatıb.

«ABB-Moskva» həmçinin banklararası kredit bazarının aktiv operatorudur. Hesabat ilində bankın banklararası kredit bazarında cəlb elədiyi kreditlərin həcmi 36,1% artaraq 11 445 mln. rubla çatıb. O cümlədən, ötən il 15 mln. dollar həcmində vəsaitin cəlb olunması üçün klub müqaviləsi bağlanıb. Bu müqavilənin iştirakçıları «Raiffeisen Zentral Bank Osterreich AG», «Rayffayzenbank» QSC, OTP «Bank Plc», «OTP Bank» ASC olub.

Keçən il bank Rusiya və Azərbaycan arasında ümumi məbləği 106 mln. dollar olan 115 min pul köçürmələri həyata keçirib. Bankın «Visa» və «MasterCard» sistemləri üzrə kart emissiyası 26 minə çatıb. Cari ilin yanvarın 1-dək plastik kartlara xidmət üçün bank 173 POS-terminalı və 40 bankomat quraşdırıb. Həmçinin, bankın satış şəbəkəsinə 2 filial, Sankt-Peterburq və Yekaterinburq şəhərlərində əlavə ofislər, eləcə də Moskvada 8 bölmə daxildir. Ümumilikdə bankın xidmət məntəqələrinin sayı 14-ə qalxıb. Hazırda bankın planlarına potensial müştərilərinin çox olduğu ərazilərə – ilk növbədə Moskva regionu və Rusiyanın Avropa hissəsinə genişlənmək daxildir.