Maliyyə

Maliyyə

Dünya birjalarında kütləvi enmə başlayıb

08 avqust 2011 13:03 (UTC +04:00)

Asiya fond bazarı illik minimuma düşüb, neftin qiyməti 3% azalıb, dolların İsveçrə frankına qarşı məzənnəsi tarixi minimuma enib. Dünyanın aparıcı ölkələrinin hökumətləri milli fond bazarının çökməməsi üçün təxirəsalınmaz tədbirlər görür.

«S&P» agentliyinin ABŞ-ın reytinqini neqativ proqnozla «AA+»ə endirməsi dünya ölkələrində ciddi narahatlıqla qarşılanıb. Hökumətlər fond və maliyyə bazarlarındakı çökmənin qarşısını almaq üçün tədbirlərə hələ dünən başlayıblar. Avqustun 7-də «Böyük-20»lik ölkələrinin maliyyə nazirliklərinin nümayəndələri fikir mübadiləsi aparmaq üçün görüşüblər.

«Böyük7»lik ölkələrinin maliyyə nazirləri və mərkəzi banklarının rəhbərləri bəyanatla çıxış edərək maliyyə sabitliyinin təmin olunması üçün səylərini əlaqələndircəklərini vəd ediblər.

Avropa Mərkəzi Bankı isə təcili müzakirələr apararaq «Securities Markets Program» proqramının başlandığını elan edib. Bu proqram İtaliya və İspaniyanın müflisləşməsinin qarşısını almaq üçün bu ölkələrin dövlət istiqrazlarının alınmasını nəzərdə tutur. Bankın bəyanatında deyilir ki, İtaliya və İspaniya istiqrazlarının alınmasına artıq bu gün səhərdən başlanacaq. Bu məqsədlə iri həcmdə vəsait ayrılıb – təkcə onu demək kifayətdir ki, istiqrazların alınması üçün gündə 2,5 mlrd. avro pul xərclənəcək. Yeri gəlmişkən, son anadək Almaniya tərəfi bəyan edirdi ki, hətta bu ölkələrə yardım olunması da defoltun qarşısını ala bilməyəcək.

Lakin, hətta bütün bu tədbirlər də bazarların sarsılmasını dayandıra bilməyib. İşə ilk başlayan Asiya-Sakit okean regionu birjaları günü kəskin enmə ilə başlayıb. Regionun ümumiləşdirilmiş «MSCI Asia Apex 50» indeksi 3,67% düşüb. İsrail birjasının indeksi daha kəskin azalıb - 7%, Yaponiyadakı «Nikkei 225» cəmi 1,69%, «S&P 500» indeksi 2,3% azalıb (son iki həftə ərzində bu indeks 11% azalıb). Dünyada baş verən bu proseslər fonunda Rusiya birjaları da enmə ilə işə başlayıb. Cəmi 2 saata RTS indeksi 2,76%, MMVB - 2,10% azalıb.

Maliyyə birjalarında dollar İsveçrə frankına qarşı tarixi minimuma (1 frank=74,85 sent) enib. Neftin qiyməti 3,3% azalıb, qızıl isə əksinə sürətlə bahalaşaraq yeni rekordlar vurmaqdadır – hazırda qızılın unsiyası 1700 dollardan baha, yəni qramı 55 dollara satılır.