Maliyyə

Ana səhifə

Maliyyə

Azərbaycan və Avstriya arasında yeni sənədlərin imzalanması gözlənilir

19 sentyabr 2011 08:19 (UTC +04:00)

«APA-Economics»in məlumatına görə, bunu Azərbaycan-Avstriya hökumətlərarası komissiyasının həmsədri Əli Abbasov bildirib.

Onun sözlərinə görə, şəhər texnologiyaları, innovasiya texnologiyaları və digər sahələri üzrə əməkdaşlığa dair bu sənədlər Avstriya prezidentinin oktyabrda Azərbaycana gözlənilən səfəri çərçivəsində imzalanacaq. İndiyədək iki ölkə arasında 28 sənəd, o cümlədən 6 hökumətlərarası sazişin imzalandığını bildirən Ə.Abbasovun sözlərinə görə, Azərbaycan və Avstriya arasında əməldaşlığın genişlənməsi nəzərdə tutulur.

Avstriaynın Azərbaycandakı səfirliyindən bildirilib ki, Vyananın İcra Hakiminin müavininin rəhbərliyi altında olan 70 nəfərlik nümayəndə heyəti Azərbaycanda səfərdədir. Azərbaycan və Avstriya arasında münasibətlər ötən illər ərzində çoxsaylı birgə iqtisadi layihələr və yüksəksəviyyəli siyasi səfərlər nəticəsində çox dinamik inkişaf edib. Hər iki ölkə və paytaxt şəhərləri arasındakı dostluğun dərinləşməsinə əlavə töhfə vermək üçün Vyana şəhəri 2011-ci ilin sentyabrın 19-22-də Bakıda siyasi, iqtisadi və ictimai-mədəni yönümlü «Vyana Bakını salamlayır» adlı proqram təşkil edib. Vyana İcra Hakiminin müavini xanım Renate Brauner bu münasibətlə 70 nəfərlik yüksək səviyyəli mütəxəssis və iqtisadi nümayəndə heyəti ilə Azərbaycana gəlib. Səfər çərçivəsində bu gün Bakıda «Azərbaycan üçün Vyananın şəhər texnologiyaları» adlı ikigünlük biznes forum başlayıb.

Avstriya-Azərbaycan Ticarət Palatası və Azpromo-nun birgə təşkil etdiyi forum çərçivəsində avstriyalı mütəxəssislər və şirkət nümayəndələri mədəniyyət və turizm idarəçiliyi, nəqliyyatın planlaşdırılması, e-hökumət, alternativ enerji və tullantıların utilizasiyası mövzularında öz praktiki bilgilərini təqdim edəcək. İqtisadi forum çərçivəsində Vyana nümayəndə heyəti Azərbaycan hökuməti (Nəqliyyat Nazirliyi, Azpromo, «Təmiz Şəhər» ASC və s.) və Bakı şəhər İcra Hakimiyyətinin, habelə Azərbaycanın tanınmış müəssisələrinin yüksəkvəzifəli nümayəndələri ilə işgüzar görüşlər keçirəcək.