Maliyyə

Ana səhifə

Maliyyə

Azərbaycanda daha bir lizinq şirkəti şəriət qaydaları ilə xidmət göstərəcək

28 sentyabr 2011 13:05 (UTC +04:00)

Bakı. Elnur Hüseynquluyev – APA-Economics. Azərbaycanın «AtaLeasing» şirkəti 2012-ci ildən İslam prinsipləri əsasında lizinq xidmətlərinə başlamaq niyyətindədir. Bunu «APA-Economics»ə açıqlamasında şirkətin İdarə Heyətinin üzvü Cavid Abbasov bildirib.

C.Abbasovun sözlərinə görə, gələn il şirkət bu sahədə işlərə başlayacaq: «Hətta şirkət tərəfindən müştərilər iki kateqoriyaya - normal və problemli müştərilərə bölünəcək. Şəriət qaydaları əsasında xidmətlərin yalnız normal müştərilər üçün göstərilməsi nəzərdə tutulub».

C.Abbasov bildirib ki, şirkət İslam lizinqində «əl-İcarə» prinsipinə əsaslanacaq: «Lakin bu növün də çox geniş çeşidləri var. Bu çeşiddən seçimlə bağlı hələ konkret qərar verilməyib. «AtaLeasing» tərəfindən Azərbaycanda bu sahə üzrə fəaliyyət göstərən yerli şirkətlərlə - «Ansar Leasing» və «Nikoil Bank» - məsləhətləşmələr aparılacaq. Azərbaycanda İslam bankçılğı və İslam lizinqi üçün üzrə böyük potensial mövcuddur».

C.Abbasov qeyd edib ki, müştərilərə təklif olunacaq faiz dərəcələrini bazar tənzimləyəcək, yəni faizlərin tətbiqi cəlb olunan maliyyə resursunun şərtlərindən asılı olacaq.

Xatırladaq ki, təsisçisi «AtaHolding» Şirkətlər Qrupu olan «AtaLeasing» şirkəti 2004-cü ildən fəaliyyət göstərir. Cari il sentyabrın 1-nə şirkətin nizamnamə kapitalı 1 mln. manat təşkil edib. Şirkət müştərilərə lizinq məhsullarını illik 20-22%-lə təklif edir.