Maliyyə

Ana səhifə

Maliyyə

«Bank Standard» son bir ildə istehlak kreditləşməsini 32% artırıb

02 noyabr 2011 14:45 (UTC +04:00)

Bakı. Elnur Hüseynquluyev – APA-Economics. Azərbaycanın «Bank Standard» QSC-nin aktivləri 2011-ci il oktyabr ayının 1-nə 691,989 mln. manat təşkil edib ki, bu da ötən ilin analoji dövrünün göstəricisi ilə müqayisədə 17,4% çoxdur.

Bankın baş ofisindən «APA-Economics»ə verilən məlumata görə, hesabat dövründə bankın kredit portfeli 5,4% artaraq 389,198 mln. manat, o cümlədən istehlak kreditlərinin həcmi 32% artaraq 88,532 mln. manat təşkil edib.

Təhlil aparılan dövr ərzində bankın depozit portfeli 30% artaraq 453,001 mln. manat, o cümlədən müddətli depozitlər 62% artaraq 367,597 mln. manat, tələb olunanadək depozitlər 96% artaraq 85,405 mln. manat, əhalidən cəlb olunan əmanətlərin həcmi isə 72% artaraq 359,438 mln. manat olub.

Həmçinin, bankın nizamnamə kapitalı sabit qalaraq 75 mln. manat təşkil edib.

Qeyd edək ki, son bir ildə bankın ümumi gəlirləri 4,6% artaraq 49,104 mln. manat, o cümlədən faiz gəlirləri 10% artaraq 38,009 mln. manat, qeyri-faiz gəlirləri isə 11% azalaraq 11,095 mln. manat olub.

Bu dövrdə bankın cəmi müştərilərinin sayı 6,2% artaraq 119 206-ya, o cümlədən fiziki şəxslərin sayı 6,3% artaraq 116 498-ə, hüquqi şəxslərin sayı isə 5,4% artaraq 2 708-ə çatıb. Həmçinin, bankın aktiv plastik kartlarının sayı 5,3% artaraq 28 200, o cümlədən debet kartlarının sayı 1,2% artaraq 19 875, kredit kartlarının sayı isə 17% artaraq 8 325 olub.

Xatırladaq ki, «AB Standard» Şirkətlər Qrupuna daxil olan «Bank Standard» 1995-ci ildən fəaliyyət göstərir. Bankın ölkə üzrə 15 filialı, 79 bankomatı, 427 POS-terminalı var.