Maliyyə

Ana səhifə

Maliyyə

Azərbaycan investorları «Apple»in səhmlərini almağa başlayıblar

10 noyabr 2011 12:11 (UTC +04:00)

Bu barədə «APA-Economics»ə vəsaitlərin idarəetməsi ilə məşğul olan «Standard Capital» broker şirkətinin direktoru Mətanət İsgəndərova məlumat verib. Onun sözlərinə görə, ötən illə müqayisədə idarəetməyə verilən vəsaitin həcmi təqribən 30% artıb.

M.İsgəndərovanın sözlərinə görə, bunun səbəblərindən biri ötən ilin sonunda Azərbaycanda bəzi bankların əmanətlər üzrə faiz dərəcələrini aşağı salması olub. Nəticədə, bəzi investorlar pullarını banklardan götürərək xarici birjalara yatırmağa başlayıb: «İndi dünya birjalarında yaxşı alətlər var və vəsaitləri idarə etmək üçün yaxşı məqamdır. Hazırda xarici birjalarda faiz dərəcələri pis deyil və ciddi risk etməmək şərti ilə ildə 12-20% qazanc götürmək mümkündür».

M.İsgəndərovanın sözlərinə görə, şirkətə idarəetməyə verilən vəsaitlər üzrə orta məbləğ 30-50 min manat, minimum məbləğ isə 10 min manat ətrafındadır.

Vəsaiti idarəetməyə verənlərin əksəriyyəti – təqribən 70%-i onun Amerika bazarına, 30%-ə qədəri isə Rusiya bazarına yatırılmasını istəyir.

Rusiya bazarına maraq göstərənlər əvvəllər əsasən neft-qaz və ənənəvi iqtisadiyyat şirkətlərinin («LUKoil», «Norilskiy nikel», «Qazprom» və s.) səhmlərini aldığı halda, indi bura indekslər və fyuçerslər də əlavə olunub. ABŞ-da isə investorlar əsasən ənənəvi iqtisadiyyat, qızıl, neft və informasiya texnologiyaları sahəsində işləyən şirkətlərə – «Apple», «Xerox» və s. pul yatırırlar.

Ekspertin sözlərinə görə, Rusiya bazarı ilə bağlı çətinlik bəzən şirkətlər barədə məlumatın kifayət qədər olmamasıdır: «Amerikada istənilən məlumatı – konqresin iclasından tutmuş şirkət rəhbərliyinin yığıncağına, qəbul etdiyi qərarlara və şirkətlərin hesabatlarına qədər tapmaq və baxmaq mümkündür. Rusiya isə informasiya baxımından zəifdir». Nəticədə, bazarı özləri izləyən investorlar Rusiya bazarına pul yatırmaqdan çəkinirlər. «Elə investrolar var ki, hətta yaxşı perspektivləri olan kağızlar da təklif olunanda Rusiya bazarına vəsait yatırmaqdan qəti surətdə imtina edirlər».