Maliyyə

Ana səhifə

Maliyyə

Azərbaycan bank sistemində məcmu mənfəət 21% artıb

10 noyabr 2011 13:04 (UTC +04:00)

Azərbaycan Mərkəzi Bankından «APA-Economics»ə verilən məlumata görə, 2010-cu ilin yanvar-avqust ayları ilə müqayisədə əldə edilmiş mənfəət 18,47 mln. manat və ya 20,6% artıb.

Qeyd edək ki, yanvar-iyul ayları ərzində bankların mənfəəti 100,04 mln. manat təşkil edib, beləliklə təkcə avqust ayında banklar 7,72 mln. manat həcmində mənfəət əldə edib. Bu da öz növbəsində cari ilin orta aylıq göstəricisindən (13,52 mln. manat) 5,8 mln. manat və ya 43% azdır.

Yanvar-avqust aylarında bankların faiz gəlirləri 716,80 mln. manat, faiz xərcləri 379,85 mln. manat təşkil edib və nəticədə, faiz mənfəəti 336,96 mln. manata bərabər olub. Eyni zamanda, bankların qeyri-faiz gəlirləri 197,25 mln. manat, qeyri-faiz xərcləri isə 330,97 mln. manat təşkil edib ki, bunun nəticəsində qeyri-faiz əməliyyatları üzrə 133,72 mln. manatlıq zərər yaranıb.

Qeyd edək ki, 2010-cu ilin yanvar-avqust ayları ilə müqayisədə faiz mənfəəti 4,6%, qeyri-faiz zərəri 20,7% artıb. O cümlədən, faiz gəlirləri 4,7%, faiz xərcləri 4,9%, qeyri-faiz əməliyyatları üzrə isə gəlirlər 14,5%, xərclər 17% artıb.

Məcmu mənfəətin illik müqayisədə artması bank sistemində müşahidə olunan sağlaşmadan xəbər verir, lakin faiz və qeyri-faiz əməliyyatları üzrə təhlil bu prosesin birtərəfli olduğunu göstərir. Belə ki, faiz əməliyyatlarında banklar çox faydalı işləyir və nəticədə burada xərclər gəlirlərin cəmi 53%-ni təşkil edir. Beləliklə, faiz əməliyyatlarında gəlirlik 47%-ə bərabərdir. Əksinə olaraq, qeyri-faiz əməliyyatlarında bankların fəaliyyəti mənfi nəticələrlə yekunlaşır. Göründüyü kimi, burada xərclər gəlirləri 1,7 dəfə üstələyir. Ümumi nəticədə faiz mənfəətinin 40%-i qeyri-faiz zərərin ödənilməsinə, 28,3%-i aktivlər üzrə xüsusi ehtiyatlara yönəldilir. Bankların sərəncamında qalan mənfəət isə faiz mənfəətinin 32,1%-ni təşkil edir.