Maliyyə

Ana səhifə

Maliyyə

Azərbaycanda yaradılacaq investisiya fondları ilə bağlı tələblər açıqlanıb

10 noyabr 2011 14:25 (UTC +04:00)

Qaydalara əsasən, Azərbaycanda yaradılacaq investisiya fondlarının kapitalının minimum məbləği 500 min manat səviyyəsində nəzərdə tutulub.

QKDK-dan «APA-Economics»ə verilən məlumata görə, fondun aktivlərinin idarə edilməsini həyata keçirən şəxsin nizamnamə kapitalının minimum məbləği isə 125 min manat həcmində müəyyən edilib. Bununla yanaşı, idarəçinin idarəetməsində olan aktivlərin həcmindən asılı olaraq nizamnamə kapitalına qoyulan tələblər də artacaq. Belə ki, aktivlərin həcmi 10 mln. manatı keçdikdən sonra idarəçi bu məbləğdən artıq olan hər 200 min manata görə öz nizamnamə kapitalını artırılan məbləğin 0,625%-i qədər, yəni 1250 manat artırmalıdır. Məcmu kapitalın artırılan hissəsi 2 mln. manata çatdıqda məcmu kapitalın artırılması tələb olunmur. Qaydalara əsasən, investisiya fondunun idarə edilməsi ilə bağlı xərclər illik olaraq fondun aktivlərinin 5%-dən artıq ola bilməz.

Qaydalara görə, Azərbaycanda investisiya fondları aktivlərin tərkibinə əsasən bir neçə qrupa bölünür. Bu, borc alətləri, səhm, qarışıq, daşınmaz əmlak və indeks investisiya fondlarıdır. Fəaliyyət formasına görə isə paylı investisiya fondu açıq, interval və ya qapalı formada yaradılır. Açıq investisiya fondları paylarının satışını və geri satın alınmasını həftədə bir dəfə, interval İF-lər ildə bir dəfə, qapalı İF-lər isə fondun fəaliyyət müddəti başa çatandan sonra həyata keçirə bilərlər.

Qaydalara əsasən, investisiya fondlarının portfelinə digər alətlərlə yanaşı, yalnız İqtisadi Əməkdaşlıq və İnkişaf Təşkilatına (İƏİT) üzv ölkələrin birjalarındakı alətlər daxil ola bilər.

İnvestisiya fondlarının aktivlərinin strukturuna dair tələblərə əsasən, ümumilikdə İF-lərin vəsaitlərinin azı 25%-i ölkə ərazisində yerləşdirilməlidir. Ayrı-ayrı investisiya fondlarının aktivləri ilə bağlı tələblər fərqlidir. Ümumi tələblərə görə, bir emitentin istiqrazlarının həcmi fondun aktivlərinin 10%-dən artıq olmamalı, eləcə də fond emitentin bir istiqraz buraxılışının 50%-dən artıq hissəsinə sahib olmamalıdır.

Səhm investisiya fondunun aktivlərinin 70%-ə qədəri Azərbaycandan kənarda fəaliyyət göstərən fond birjalarında listinqdən keçmiş səhmlərə yatırıla bilər. Qaydalara görə, investisiya fondlarının səhmləri investorlara satılmazdan əvvəl investorlara risklər haqqında xəbərdarlıq edilməlidir. İnvestorlar İF-lərə pul yatırmazdan əvvəl «Risklər haqqında Xəbərdarlıq» sənədini imzalamalıdır. Sənəddə hökmən bu cümlələr olmalıdır: «İnvestisiya fondlarına kapital qoyuluşu təminatlı gəlirlər vəd etmir. Sizin ilkin kapitalınızın və sonradan əldə etdiyiniz gəlirinizin, fonddan çıxdığınız zaman xalis aktivlərin bir paya/səhmə düşən miqdarından asılı olaraq, bir hissəsi və ya hamısı itirilə bilər».

Bu qaydalarla yanaşı, «Səhmdar investisiya fondunun və idarəçinin icra orqanının üzvlərinin attestasiyası Qaydaları», «İnvestisiya fondlarının kənar auditorlarına dair tələblər haqqında Qaydalar», «İnvestisiya fondlarının və idarəçinin hesabatlarına dair tələblər, habelə onların təqdim edilməsi və acıqlanması Qaydaları» da təsdiqlənib.