Maliyyə

Ana səhifə

Maliyyə

Azərbaycan Mərkəzi Bankı növbəti rüblük Pul siyasəti İcmalını açıqlayıb

11 noyabr 2011 09:11 (UTC +04:00)

«APA-Economics»in məlumatına görə, bu barədə Mərkəzi Bankın yanvar-sentyabr ayları üzrə Pul siyasəti İcmalında bildirilir.

Dünya bazarlarında neftin yüksək qiyməti fonunda ölkənin tədiyyə balansında yüksək profisit valyuta ehtiyatlarının artımını təmin edib və iqtisadi artıma müsbət təsir göstərib. Bu fonda Azərbaycan iqtisadiyyatında cari ilin 9 ayında iqtisadi artım prosesləri davam edib və makroiqtisadi sabitlik qorunub. Tədiyyə balansının yüksək profisiti şəraitində manatın ABŞ dollarına qarşı məzənnəsi sabit qalıb və valyuta bazarı özünü tənzimləmə rejimində fəaliyyət göstərib. Hesabat dövründə inflyasiya birrəqəmli səviyyədə olub və əsasən ərzaq inflyasiyasından təsirlənib.

Mərkəzi Bank pul siyasətinin bəyan olunmuş başlıca istiqamətlərinə uyğun olaraq öz fəaliyyətini inflyasiyanın məqbul səviyyədə saxlanmasına, manatın məzənnəsinin sabitliyinin qorunmasına, bank-maliyyə sektorunda inkişafın və dayanıqlığın təmin olunmasına yönəldib. Bu hədəflərin reallaşması çərçivəsində Mərkəzi Bank öz siyasətinə korreksiyalar etməklə makroiqtisadi və maliyyə sabitliyinin qorunmasına zəruri dəstək verib. Qlobal ərzaq qiymətlərinin artımını və məcmu tələbin genişlənməsini nəzərə alaraq Mərkəzi Bank antiinflyasiya xarakterli pul siyasəti həyata keçirib.

İcmala əsasən, 2011-ci ilin 9 ayında əlverişli xarici mövqe və daxili tələbin genişlənməsi şəraitində ölkə iqtisadiyyatında artım davam edib. Qlobal mühitdən gələn müəyyən risklərə baxmayaraq, dövr ərzində makroiqtisadi sabitlik qorunub.

Qeyd edilir ki, hökumətin, Mərkəzi Bankın, habelə beynəlxalq institutların proqnozlarına görə, yaxın perspektivdə ölkədə iqtisadi artımın davam edəcəyi gözlənilir. Beynəlxalq Valyuta Fondu açıqladığı son iqtisadi xülasəsində Azərbaycan üzrə iqtisadi artımın bu il və gələn il də davam edəcəyini qeyd edib. Fond ölkə üzrə iqtisadi artımı 2011-ci və 2012-ci illər üçün müvafiq olaraq 0,2% və 7,1% proqnozlaşdırır. O cümlədən, BVF cari ildə Azərbaycanın qeyri-neft sektoru üzrə ÜDM-in 9%-dən çox artacağını proqnozlaşdırır.

İcmalda deyilir ki, AMB tərəfindən aparılan Real Sektorun Monitorinqi (RSM) də iqtisadi aktivlik üzrə gözləntilərin optimist olduğunu göstərir. Belə ki, RSM-in nəticələrinə əsasən, ilin əvvəlindən sənaye üzrə istehsal və xidmət üzrə tələb gözləntisi indeksi artıma meyllidir. Pozitiv gözləntilər xüsusilə sənayenin kimya, tikinti materiallarının istehsalı və toxuculuq alt seksiyalarında, xidmətin isə rabitə, otel, nəqliyyat seqmentlərində müşahidə edilir. Gözləntilərin belə pozitiv olması sənayedə realizə olunmamış izafi mal ehtiyatının azalmasında da özünü büruzə verir.