Maliyyə

Ana səhifə

Maliyyə

Bakıda Azərbaycan-Macarıstan hökumətlərarası komissiyasının iclası keçirilib - FOTOSESSİYA

Bakıda Azərbaycan-Macarıstan hökumətlərarası komissiyasının iclası keçirilib - <font color=red>FOTOSESSİYA</font>

11 noyabr 2011 11:48 (UTC +04:00)

«APA-Economics»in məlumatına görə, tədbir Macarıstan prezidenti Pal Şmitin Azərbaycana rəsmi səfəri çərçivəsində təşkil olunub.

Tədbirdə çıxış edən Azərbaycanın iqtisadi inkişaf naziri, Azərbaycan-Macarıstan hökumətlərarası komissiyasının həmsədri Şahin Mustafayev iki ölkə arasında mövcud əlaqələrdən danışıb və qeyd edib ki, cari ilin ilk 9 ayı ərzində Azərbaycanla Macarıstan arasında ticarət dövriyyəsi ötən ilin analoji dövrü ilə müqayisədə 2,5 dəfə artıb: «Bununla belə, mövcud iqtisadi əlaqələrin daha da genişləndirilməsi üçün böyük potensial mövcuddur».

Ş.Mustafayev Azərbaycan iqtisadiyyatı, sahibkarlıq fəaliyyətinin genişləndirilməsi, həmçinin biznes və investisiya mühitinin yaxşılaşdırılması istiqamətində həyata keçirilən tədbirlər barədə məlumat verib və qeyd edib ki, Azərbaycan Avropanın enerji təhlükəsizliyinin təmin olunmasında fəal iştirak edir.

Ölkə iqtisadiyyatının inkişafından danışan Ş.Mustafayev həmçinin qeyd edib ki, 2004-2010-cu illərdə ölkədə ÜDM 3 dəfə, qeyri-neft sektoru 2 dəfə, orta aylıq əmək haqqı 4,3 dəfə, ticarət dövriyyəsi 5,4 dəfə, strateji valyuta ehtiyatları 18,4 dəfə artıb, yoxsulluğun səviyyəsi 5 dəfə azalıb: «Müstəqillik illərində Azərbaycan iqtisadiyyatına 100 mlrd. ABŞ dollarından çox investisiya yatırılıb ki, bunun da yarısı xarici investisiyalardır. Adambaşına düşən investisiyanın həcminə görə Azərbaycan MDB və Şərqi Avropa ölkələri arasında əhəmiyyətli yer tutur».

Öz növbəsində iclasda çıxış edən Macarıstan Milli İqtisadiyyat Nazirliyinin dövlət katibi, Azərbaycan-Macarıstan hökumətlərarası komissiyasının həmsədri xanım Roza Nad rəsmi Budapeştin mövcud əlaqələrə böyük əhəmiyyət verdiyini və əməkdaşlığın genişləndirilməsində maraqlı olduğunu bildirib.

İclasda ticarət, qarşılıqlı investisiya qoyuluşu, kiçik və orta sahibkarlığın inkişafı, sənaye, kənd təsərrüfatı, tikinti, nəqliyyat, İKT, elm və təhsil, turizm, mədəniyyət, ətraf mühitin mühafizəsi, maliyyə və bank, səhiyyə və digər sahələrə dair müzakirələr aparılıb.

Sonda Azərbaycan və Macarıstan arasında iqtisadi əməkdaşlıq üzrə birgə hökumətlərarası komissiyasının II iclasının yekunlarına dair protokol imzalanıb. Sənədi Azərbaycan tərəfindən Ş.Mustafayev, Macarıstan tərəfindən isə R.Nad imzalayıblar. Sənəddə müxtəlif sahələrdə – sənaye, kənd təsərrüfatı, tikinti, nəqliyyat, İKT, elm və təhsil, turizm, mədəniyyət, ətraf mühitin mühafizəsi, maliyyə və bank, səhiyyə və s. sahələrdə əməkdaşlığın genişləndirilməsi nəzərdə tutulur.

Bundan başqa, iclas çərçivəsində Azərbaycan Standartlaşdırma, Metrologiya və Patent üzrə Dövlət Komitəsi ilə Macarıstan Ticarət və Lisenziyalaşdırma İdarəsi arasında metrologiya sahəsində texniki əməkdaşlıq haqqında anlaşma memorandumu imzalanıb.