Maliyyə

Ana səhifə

Maliyyə

Azərbaycan parlamenti 2012-ci il dövlət büdcəsinin layihəsi üzrə müzakirələri komitələr səviyyəsində davam etdirir

16 noyabr 2011 09:09 (UTC +04:00)

APA-nın məlumatına görə, müzakirələrdə millət vəkilləri və hökumət strukturlarının rəsmiləri iştirak ediblər.

Dövlət büdcəsinin layihəsi barədə məlumat verən maliyyə naziri Samir Şərifov bildirib ki, büdcə layihəsinin tərtibi zamanı 2011-ci ilin yanvar-sentyabr aylarının göstəriciləri də nəzərə alınıb.

S.Şərifov qeyd edib ki, büdcənin tərtibi zamanı İqtisadi İnkişaf Nazrliyinin 2010-2012-ci illər üçün hazırladığı makroiqtisadi proqnoz göstəriciləri əsas götürülüb. Belə ki, neftin 1 barelinin qiyməti 80 ABŞ dolları səviyyəsində nəzərə alınıb. Dövlət büdcəsi və icmal büdcənin tərtibinə ehtiyatla yanaşılıb. Əsasən, icrasına 2011-ci ilədək başlanmış layihələrin maliyyələşdirilməsinə diqqət yönəldilib.

Nazirin sözlərinə görə, 2012-ci il dövlət büdcəsinin gəlirləri 16 436,4 mln. manat, xərcləri 16 984,4 mln. manat, büdcə kəsiri 548 mln. manat həcmində proqnozlaşdırılır. Gələn ilki büdcənin gəlirlərinin ÜDM-ə nisbəti 37,8% səviyyəsində proqnozlaşdırılır ki, bu da 2011-ci ilə nisbətən 1 faiz bəndi çoxdur.

Gələn il Vergilər Nazirliyi tərəfindən dövlət büdcəsinə 5,1 mlrd. manat vəsait daxil olması gözlənilir. Bakı şəhəri istisna olunmaqla, rayon və digər şəhərlər üzrə gəlirlər 410 mln. manat səviyyəsində proqnozlaşdırılır.

Bununla yanaşı, Dövlət Gömrük Komitəsinin xətti ilə büdcə gəlirlərinin 1,2 mlrd. manat, Azərbaycan Dövlət Neft Fondundan transferlərin 9,905 mlrd. manat olacağı proqnozlaşdırılır.

Cari xərclərin büdcədə xüsusi çəkisi 3 faiz artıb. Təhsil xərcləri 12,6%, elm xərcləri 7%, müdafiə xərcləri isə 1,2% artımla nəzərdə tutulub.

İlk dəfə olaraq 2012-ci ilin dövlət büdcəsində «Azərbaycan gəncliyi 2012-2015-ci illərdə Dövlət Proqramı» üçün 20 mln. manat həcmində vəsaitin ayrılması planlaşdırılır.

Naxçıvan MR-nın 2012-ci il büdcəsinin gəlir və xərcləri 305 mln. manat həcmində proqnozlaşdırılır. Xərclərin 84,5%-i dövlət büdcəsindən dotasiyalar hesabına formalaşacaq.

Hesablama Palatasının sədri Heydər Əsədov isə bildirib ki, təmsil etdiyi qurum büdcə layihəsi barədə rəyini Milli Məclisə təqdim edib. H.Əsədovun sözlərinə görə, növbəti ildə büdcə iqtisadi artıma imkan verəcək. Büdcə artan ictimai tələbata yönəlib, sənədin şəffaflığı istiqamətində də mühüm addımlar atılıb. Sair və digər xərclərin xüsusi çəkisi azalmağa başlayıb. Palata ümumilikdə dövlət büdcəsinin layihəsini müsbət qiymətləndirir.

Hazırda 2012-ci il dövlət büdcəsinin layihəsi ətrafında komitələrin iclasında müzakirələr davam edir. Deputatlar öz rəy və təkliflərini bildirirlər.