Maliyyə

Ana səhifə

Maliyyə

«Azərqarant» şirkəti son bir ildə daxilolmalarını 45% artırıb

27 dekabr 2011 14:42 (UTC +04:00)

Bakı. Elnur Hüseynquluyev – APA-Economics. Azərbaycanın «Azərqarant» sığorta şirkətinin 2011-ci ilin yanvar-noyabr aylarında topladığı sığorta haqlarının həcmi 1,204 mln. manat təşkil edib ki, bu da ötən ilin analoji dövrünün göstəricisi ilə müqayisədə 45% çoxdur.

Şirkətin baş ofisindən «APA-Economics»ə verilən məlumata görə, hesabat dövründə şirkətin sığorta riskləri üzrə ödənişləri 4,3 dəfə artaraq 305,947 min manat təşkil edib.

Hesabat dövründə könüllü sığorta növləri üzrə 740,381 min manat, icbari sığortalar üzrə isə 463,372 min manat həcmində sığorta haqqı yığılıb. Bundan başqa, könüllü sığorta növləri üzrə 245,809 min manat, icbari sığorta növləri üzrə isə 60,137 min manat ödəniş aparılıb.

Toplanan sığorta haqlarının çox hissəsi «Fərdi qəza və xəstəlik sığortası» (415,684 min manat), «Avtonəqliyyat vasitəsi sahiblərinin mülki məsuliyyətinin icbari sığortası» (438,108 min manat) və «Avtonəqliyyat vasitələrinin sığortası» (177,674 min manat) növlərinin payına düşüb. Bu növlərin ümumi daxilolmalarda xüsusi çəkisi müvafiq olaraq 35%, 36,4% və 15% təşkil edib.

Ödənişlərə gəldikdə isə ən çox vəsait «Fərdi qəza və xəstəlik sığortası» (89,324 min manat və ya 29%) və «Avtonəqliyyat vasitəsi sahiblərinin mülki məsuliyyətinin icbari sığortası» (48,456 min manat və ya 16%) növləri üzrə ödənilib.

Xatırladaq ki, təsisçisi bir yerli fiziki şəxs olan «Azərqarant» sığorta şirkəti 1993-cü ildən fəaliyyət göstərir. Cari ilin dekabrın 1-nə şirkətin nizamnamə kapitalı 5,210 mln. manat təşkil edib. Şirkət 23 könüllü və 4 icbari sığorta növü üzrə xidmət göstərir.