Maliyyə

Ana səhifə

Maliyyə

Azərbaycandakı sığorta şirkətlərinə kapitalın yetərliliyi ilə bağlı tələbin icrası üçün yanvarın 20-dək vaxt verilib

05 yanvar 2012 08:44 (UTC +04:00)

Maliyyə Nazirliyinin Dövlət sığorta Nəzarəti Xidmətindən «APA-Economics»ə verilən məlumata görə, yanvarın 20-dək bütün sığorta şirkətləri Nazirliyə təqdim etdiyi hesabatlarında kapitalın həcmi minimum 4 mln. manat həcmində göstərilməlidir.

Qeyd edək ki, 2012-ci il yanvarın 1-dən sığorta şirkətlərinin tələb olunan kapitalın minimum məbləği 4 mln. manat, təkrarsığorta şirkətləri üçün 8 mln. manat nəzərdə tutulub. Gələn ilin yanvarın 1-dək isə bu məbləğ sığorta şirkəti üçün 5 mln. manata, təkrarsığortaçılar üçün isə 10 mln. manata çatdırılmalıdır.

Aparılan araşdırmaya görə, kapitalın həcminə görə ilk beşliyə «PAŞA Sığorta», «Xalq Sığorta», «Standard Insurance», «AzSığorta» və «İpək Yolu Sığorta» şirkətləri daxildir.

Qeyd edək ki, sığorta və təkrarsığorta təşkilatlarının tələb olunan kapitalın minimum məbləğinin müəyyən edilməsi haqqında qərar Maliyyə Nazirliyinin Kollegiyasının 2010-cu ilin noyabr ayında keçirilən iclasında qəbul edilib.

Qərarın qəbul edilməsi zamanı dünya maliyyə böhranının sığortaçıların və təkrarsığortaçıların maliyyə vəziyyətinə, habelə ölkənin sığorta bazarının inkişaf dinamikasına təsirləri təhlil edilib və «Sığorta fəaliyyəti haqqında» qanunun 79.2-ci maddəsi rəhbər tutulmaqla, Azərbaycan Sığortaçılar Assosiasiyasının müraciəti nəzərə alınıb.