Maliyyə

Ana səhifə

Maliyyə

Azərbaycan Hesablama Palatası bu il yoxlayacağı sahələri açıqlayıb

12 yanvar 2012 08:51 (UTC +04:00)

Bakı. Əli Əhmədov - APA-Economics. Azərbaycan Hesablama Palatası 2012-ci ildə Dövlət Sosial Müdafiə Fondunun Bərdə və İmişli rayon şöbələrinin gəlir və xərclərinin icrasını, dövlət büdcəsindən Milli Arxiv İdarəsinə ayrılan vəsaitlərin istifadəsini, “Kənd təsərrüfatının inkişafı və kreditləşdirilməsi - II” layihəsi üzrə dövlət büdcəsinin vəsaiti, Dünya Bankından cəlb edilmiş kredit vəsaitləri və qrant vəsaitlərinin istifadə vəziyyətini araşdıracaq.

Hesablama Palatasından «APA-Economics»ə verilən məlumata görə, palatanın bu günlərdə keçirilən kollegiya iclasında müxtəlif sahələrə ayrılan vəsaitlərin istifadəsi ilə bağlı audit proqramları təsdiq edilib.

Proqrama əsasən bu il Zərdab və Ağdaş rayon İcra Hakimiyyətlərinin tabeliyində olan idarə, müəssisə və təşkilatlara dövlət büdcəsindən ayrılan vəsaitlərin proqnozlaşdırılması və istifadəsi, dövlət büdcəsindən Təhsil Nazirliyinin tabeliyində olan Kimya-Biologiya Təmayüllü Respublika Liseyinə, S.Rüstəm adına Xarici Dillər təmayüllü Gimnaziyasına, Sağlamlıq imkanları məhdud uşaqlar üçün 3 saylı Respublika xüsusi internat məktəbinə və E.Mirzəyev adına Sağlamlıq imkanları məhdud uşaqlar üçün 6 nömrəli Respublika xüsusi internat məktəbinə ayrılan büdcə vəsaitlərinin proqnozlaşdırılması və istifadə olunması araşdırılacaq.

Bundan başqa, Səhiyyə Nazirliyinə ayrılan vəsaitlərin istifadəsi, Qusar və Astara rayon İcra Hakimiyyətlərinə dövlət büdcəsində nəzərdə tutulmuş Ehtiyat Fondlarından və əsaslı vəsait qoyuluşundan avtomobil yollarının tikintisinə (təmirinə) ayrılan vəsaitlərin istifadəsinə dair audit proqramı da təsdiqlənib.

İclasda həmçinin “Azərbaycan Respublikası Hesablama Palatası tərəfindən maliyyə-büdcə nəzarəti tədbirlərinin hazırlanması, keçirilməsi və nəticələrinin rəsmiləşdirilməsi Qaydaları”na dəyişiklik də təsdiqlənib.