Maliyyə

Ana səhifə

Maliyyə

«Aqrarkredit» ötən il 606 sahibkarlıq subyektinə 6,3 mln. manatlıq kredit verib

12 yanvar 2012 13:31 (UTC +04:00)

Bakı. Elnur Hüseynquluyev – APA-Economics. Azərbaycanın «Aqrarkredit» bank olmayan kredit təşkilatının məcmu aktivləri 2012-ci il yanvarın 1-nə 25,9 mln. manat, kredit portfeli 16,6 mln. manat, məcmu kapitalı 19,5 mln. manat, o cümlədən nizamnamə kapitalı 18,5 mln. manat təşkil edib.

Təşkilatın baş ofisindən «APA-Economics»ə verilən məlumata görə, 2011-ci il ərzində «Aqrarkredit» tərəfindən Kənd Yerlərinin Kreditləşməsi xətti ilə 606 sahibkarlıq subyektinə və 301 borcalan qrupunun 1 200 üzvünə 6,3 mln. manat, o cümlədən heyvandarlığın inkişafına 3,3 mln. manat, bitkiçiliyin inkişafına 0,5 mln. manat, ticarət və xidmət sahələrinə 2,4 mln. manat, digər sahələrə 0,1 mln. manat, Sahibkarlığa Kömək Milli Fondunun vəsaitləri hesabına isə 139 sahibkarlıq subyektinə 1,8 mln. manat kredit verilib.

Həmin dövr ərzində Kənd Təsərrüfatının İnkişafı üzrə Beynəlxalq Fondunun (IFAD) maliyyələşdirdiyi «Şimal-Şərq İnkişaf Layihəsi» çərçivəsində Abşeron, Xızı, Siyəzən və Şabran rayonlarında 24 sahibkarlıq subyektinə və 101 borcalan qrupunun 400 üzvünə 342 min manat, eləcə də həmin fondun maliyyələşdirdiyi «Şimal-Qərb Kənd İnkişaf Layihəsi» çərçivəsində Qazax, Ağstafa, Tovuz, Şəmkir rayonlarında 45 fərdi sahibkara və 579 borcalan qrupunun 2 300-dən çox üzvünə 1,7 mln. manat kredit verilib.

Ötən il Yaponiya hökumətinin qrantı və Tərəfdaşlıq Fondu hesabına ötən illərdə alınmış və lizinq qaydasında kənd təsərrüfatı məhsulları istehsalçılarına icarəyə verilmiş kənd təsərrüfatı texnikasının istifadəsindən Tərəfdaşlıq Fondunun hesabına 259,9 min manat vəsait toplanılıb.

Qeyd edək ki, hesabat ilində təşkilatın ümumi gəlirləri 4,119 mln. manat, xərcləri isə 3,897 mln. manat olub. Nəticədə, «Aqrarkredit»in mənfəəti 221,5 min manat təşkil edib.