Maliyyə

Ana səhifə

Maliyyə

Azərbaycanın dövlət büdcəsinin gəlirləri 38%, xərcləri isə 31% artıb

18 yanvar 2012 15:45 (UTC +04:00)

Nəticədə 305,9 mln. manat məbləğində profisit yaranıb. Bu barədə «APA-Economics» Azərbaycan Maliyyə Nazirliyindən bildirilib.

Nazirlikdən verilən məlumata görə, 2011-ci ildə dövlət büdcəsinin mədaxili 100,9% icra olunub ki, bu da 2010-cu illə müqayisədə 4 297,6 mln. manat və ya 37,7% çoxdur: «Vergilər Nazirliyi mədaxil proqnozunu 106% icra etməklə dövlət büdcəsinə 5 472,0 mln. manat vəsait təmin edib ki, bu da proqnoza nisbətən 312 mln. manat, 2010-cu ilə nisbətən isə 1 179,2 mln. manat və ya 27,5% çoxdur. Hesabat ilində Dövlət Gömrük Komitəsi proqnoza 100,1% əməl edərək büdcəyə 1 141,5 mln. manat vəsait təmin edib».

Ümumiyyətlə, 2011-ci ildə sair gəlirlərdən nəzərdə tutulan 51 mln. manata qarşı büdcəyə 87,1 mln. manat və ya proqnoza nisbətən 70,7% çox vəsait daxil olub.

Dövlət Neft Fondundan büdcəyə tələb olunan məbləğdə, yəni 9 mlrd. manat vəsait transfert edilib.

Xərclərə gəldikdə isə, 2011-ci ildə dövlət büdcəsinin xərcləri 96,6% icra edilib ki, bu da 2010-cu ilə nisbətən 3 628,8 mln. manat və ya 30,8% çoxdur: «Ötən il cari xərclərə dövlət büdcəsi xərclərinin 46,7%-i həcmində və ya 7 190,7 mln. manat vəsait sərf edilib ki, bu da 2010-cu illə müqayisədə 544,4 mln. manat və ya 8,2% çoxdur».

Əsaslı xərclərə 7 860,9 mln. manat və ya dövlət büdcəsi xərclərinin 51,1%-i həcmində vəsait yönəldilib ki, bu da 2010-cu ilə nisbətən 2 833,0 mln. manat və ya 56,3% çoxdur: «Həmin vəsaitin 5 854,0 mln. manatı dövlət əsaslı vəsait qoyuluşu xərclərinə, 2 006,9 mln. manatı isə büdcə təşkilatlarına əsas vəsaitlərin alınması xərclərinə sərf edilib».

Dövlət borclarına xidmətlə bağlı xərclərə dövlət büdcəsi xərclərinin 2,2%-i həcmində və ya 343,1 mln. manat vəsait istifadə olunub ki, bu da 2010-cu illə müqayisədə 252,4 mln. manat və ya 3,7 dəfə çoxdur.

«Hesabat ilində sosial yönümlü xərclərin maliyyələşdirilməsinə dövlət büdcəsi xərclərinin 28,2%-i və ya 4 340,1 mln. manatı yönəldilib ki, bu da 2010-ci illə müqayisədə 637 mln. manat və ya 17,2% çoxdur», - deyə nazirlikdən bildirilib.

Eyni zamanda, 2011-ci il ərzində istifadə olunan 5 854,0 mln. manat dövlət əsaslı vəsait qoyuluşu xərclərindən sosial təyinatlı layihələr üzrə (təhsil, səhiyyə, mədəniyyət, idman və digər sosial-mədəni və məişət təyinatlı) obyektlərin tikintisinə və yenidənqurulmasına 729,5 mln. manat, enerji, su təchizatı, qaz, nəqliyyat, kommunal, meliorasiya infrastrukturlarının və bu qəbildən olan digər obyektlərin tikintisinə, yenidən qurulmasına və müvafiq avadanlıqların alınmasına 5 124,5 mln. manat vəsait yönəldilib.

Qeyd edək ki, 2010-cu ildə Azərbaycanın dövlət büdcəsində 363,5 mln. manatlıq kəsir yaranmışdır.