Maliyyə

Ana səhifə

Maliyyə

Azərbaycanın qiymətli kağızlar bazarında əməliyyatların həcmi ötən il 4 dəfə artıb

19 yanvar 2012 08:59 (UTC +04:00)

Bakı. Nicat Mustafayev – APA-Economics. Ötən il ərzində Azərbaycanın qiymətli kağızlar bazarı fəaliyyətini qeyri-neft sektorunun yüksək templi artımı və antiinflyasiya xarakterli pul siyasəti fonunda davam etdirib.
Qiymətli Kağızlar üzrə Dövlət Komitəsindən (QKDK) «APA-Economics»ə verilən məlumata görə, bu amillər qiymətli kağızların ilkin və təkrar bazar əməliyyatlarının sayına və həcminə, habelə qiymətli kağızların gəlirliyinə təsir göstərib. Nəticədə, 2011-ci il ərzində bazarın bütün seqmentləri üzrə canlanma müşahidə olunub və il ərzində qiymətli kağızlar bazarında əməliyyatların sayı ötən ilin müvafiq dövrü ilə müqayisədə 23%, əməliyyatların həcmi isə 3,8 dəfə artaraq 8,862 mlrd. manat təşkil edib.
«Hesabat ilində korporativ qiymətli kağızlar bazarının dinamikasında yüksək artım templəri müşahidə edilib və özəl sektorun qiymətli kağızlar bazarı vasitəsilə maliyyələşmə təşəbbüsləri genişlənib. Belə ki, 2011-ci il ərzində korporativ qiymətli kağızlar bazarında əməliyyatların sayı ötən ilin müvafiq dövrü ilə müqayisədə 13%, əməliyyatların həcmi isə 2,7 dəfə artaraq 2,144 mlrd. manat təşkil edib. Korporativ qiymətli kağızlarla əməliyyatların 48%-ni səhmlər, 52%-ni isə korporativ istiqrazlar təşkil edib», - deyə Komitədən bildirilib.
QKDK-nın məlumatına əsasən, 2011-ci il ərzində səhm bazarında əməliyyatların sayı ötən ilin müvafiq dövrü ilə müqayisədə 14%, əməliyyatların həcmi isə 2 dəfə artaraq 1,029 mlrd. manat təşkil edib. Dövr ərzində korporativ istiqrazların ilkin və təkrar bazarı isə ötən ilin müvafiq dövrü ilə müqayisədə 3,7 dəfə artaraq 1,115 mlrd. manat təşkil edib: «Hesabat dövründə borc alətləri vasitəsilə maliyyələşmə imkanlarına marağın artması da müşahidə olunub. Belə ki, korporativ borc bazarının ilkin bazarında əməliyyatların həcmi 4 dəfə artaraq 584,7 mln. manat təşkil edib».
«Hesabat dövrü ərzində pul siyasətinin antiinflyasiya xarakteri alması ilə dövlət qiymətli kağızlar bazarının həcmi əhəmiyyətli dərəcədə artıb. Belə ki, il ərzində dövlət qiymətli kağızlar bazarında əməliyyatların sayı ötən ilin müvafiq dövrü ilə müqayisədə 1,6 dəfə, əməliyyatların həcmi isə 4,4 dəfə artaraq 6,717 mlrd. manat təşkil edib. Dövlət qiymətli kağızlar bazarında əməliyyatların 4%-ni Maliyyə Nazirliyi tərəfindən emissiya olunan dövlət istiqrazları, 10%-ni Mərkəzi Bankın notları, 86%-ni isə qiymətli kağızlarla repo əməliyyatları təşkil edib», - deyə QKDK-dan bildirilib.
Ötən il ərzində sterilizasiya alətləri olan Mərkəzi Bankın notları ilə əməliyyatların sayı 73%, notlarla əməliyyatların həcmi isə 2,9 dəfə artaraq 655 mln. manat təşkil edib: «Ötən il ərzində dövlət istiqrazlarının ilkin və təkrar bazarının həcmi 38,5% azalıb, lakin müxtəlif müddətli istiqrazların gəlirlikləri üzrə artım müşahidə olunub. Hesabat dövrü ərzində repo əməliyyatlarının sayı ötən ilin müvafiq dövrü ilə müqayisədə 86%, əməliyyatların həcmi isə 6,9 dəfə artaraq 5,781 mlrd. manat təşkil edib. Hesabat dövrü ərzində repo əməliyyatlarının 99%-i Mərkəzi Bankın notları, 1%-i isə dövlət istiqrazları vasitəsilə həyata keçirilib».