Maliyyə

Ana səhifə

Maliyyə

BP-nin maliyyələşdirdiyi “Makroiqtisadi idarəetmə və institusional islahatlar üzrə məsləhət xidmətləri” layihəsi başa çatıb

26 yanvar 2012 16:14 (UTC +04:00)

Bakı - APA-Economics. İqtisadi İnkişaf Nazirliyində (İİN) Avropa Sosial-İqtisadi Tədqiqatlar Mərkəzi (CASE) tərəfindən bp və onun tərəfdaşlarının maliyyə dəstəyi ilə həyata keçirilmiş “Makroiqtisadi idarəetmə və institusional islahatlar üzrə məsləhət xidmətləri” layihəsinin başa çatması ilə bağlı Konfrans keçirilib.

Nazirlikdən “APA-Economics”ə verilən məlumata görə, tədbirdə İİN, CASE və bp-nin nümayəndələri iştirak ediblər.

Konfransda çıxış edən iqtisadi inkişaf nazirinin müavini Sevinc Həsənova qeyd edib ki, ölkədə elmi əsaslara və liberal bazar iqtisadiyyatı prinsiplərinə söykənən, insan amilini əsas tutan çevik iqtisadi siyasətin həyata keçirilməsi nəticəsində Azərbaycan keyfiyyətcə yeni inkişaf mərhələsinə qədəm qoyub. Qeyd edilib ki, 2008-ci ilin sentyabr ayından etibarən bp şirkətinin dəstəyi ilə həyata keçirilmiş “Makroiqtisadi idarəetmə və institusional islahatlar üzrə məsləhət xidmətləri” layihəsi çərçivəsində makroiqtisadi proqnozlaşdırmanın təkmilləşdirilməsi istiqamətində CASE və İİN-in mütəxəssislərinin birgə əməkdaşlığı uğurlu nəticələr verib, makroiqtisadi proqnozlaşdırma modeli təkmilləşdirilib, sahələr üzrə proqnozlaşdırma, eləcə də inflyasiyanın proqnozlaşdırılması modelləri yaradılıb.

bp şirkətinin vitse-prezidenti Seymur Xəlilov çıxışında layihə barədə məlumat verərək bildirib ki, bp şirkəti və tərəfdaşları tərəfindən maliyyələşdirilmiş “Makroiqtisadi idarəetmə və institusional islahatlar üzrə məsləhət xidmətləri” layihəsi makroiqtisadi təhlil və institusional islahatların planlaşdırılmasında İİN-in potensialının inkişaf etdirilməsinə öz töhfəsini verib.

Sonra İİN-in makroiqtisadi təhlil və proqnozlaşdırma sahəsi üzrə mütəxəssisləri “2012-2015-ci illərdə Azərbaycan iqtisadiyyatı: Azərbaycanın inkişaf potensialı”, “Qeyri-neft sənayesinin proqnozlaşdırılması”, “Azərbaycanda inflyasiyanın proqnozlaşdırılması” mövzulıarında təqdimatlarlarla çıxış ediblər.

Konfransda həmçinin beynəlxalq ekspertlərin - CASE-nin aparıcı elmi əməkdaşı, professor Marek Dabrovskinin “Qlobal maliyyə böhranının ikinci dalğasının inkişaf etməkdə olan iqtisadiyyatlara potensial təsiri”, “BP-Rusiya”nın baş iqtisadçısı, doktor Lev Freynkmanın “Qlobal enerjiyə tələbdə uzun müddətli trendlər” və CASE-nin prezidenti, doktor Lyuk Barbonenin “İqtisadi diversifikasiya və institutlar. Beynəlxalq təcrübədən nəticələr” mövzularında məruzələri dinlənilib.

Tədbirdə iqtisadiyyatın proqnozlaşdırılması, makroiqtisadi təhlil sahəsində gələcək addımlar, dünya iqtisadiyyatındakı qlobal proseslər ətrafında geniş fikir mübadiləsi aparılıb.