Maliyyə

Ana səhifə

Maliyyə

«Azər-Türk Bank» ötən il istehlak kreditləşməsini 37% artırıb

27 yanvar 2012 12:40 (UTC +04:00)

Bakı. Elnur Hüseynquluyev – APA-Economics. «Azər-Türk Bank» ASC-nin aktivlərinin həcmi 2012-ci il yanvarın 1-nə 64,930 mln. manat təşkil edib ki, bu da 2010-cu ilin nəticələri ilə müqayisədə 5,9% çoxdur.

Bankın baş ofisindən «APA-Economics»ə verilən məlumata görə, hesabat ilində bankın kredit portfeli 25% artaraq 39,150 mln. manata, o cümlədən istehlak kreditlərinin həcmi 37% artaraq 16,789 mln. manata, qısamüddətli kreditlərin həcmi (12 ayadək) 33% artaraq 6,130 mln. manat, uzunmüddətli kreditlər isə 24% artaraq 33,019 mln. manata çatıb.

Bu müddət ərzində bankın depozit portfeli 29,545 mln. manat, o cümlədən əhalidən cəlb edilmiş əmanətlərin həcmi 15,649 mln. manat, müddətli depozitlər 18,285 mln. manat, tələb olunan depozitlər isə 11,260 mln. manat olub.

Tədqiqat aparılan il ərzində bankın məcmu kapitalı 5,8% artaraq 12,859 mln. manat, o cümlədən nizamnamə kapitalı 5,8% artaraq 11,624 mln. manat təşkil edib.

Qeyd edək ki, ötən il ərzində bankın cəmi gəlirləri 6,2% artaraq 8,113 mln. manat, xərcləri isə 8,1% ataraq 6,916 mln. manat olub. Nəticədə, ötən il bankın əldə etdiyi mənfəətin həcmi 1,197 mln. manat təşkil edib.

Xatırladaq ki, «Azər-Türk Bank» 1995-ci ildən fəaliyyət göstərir. Bankın səhmdarları rolunda Türkiyənin «Ziraat Bankası» (46%), «Ziraat Bank İnternational AG» (4%) və Azərbaycanın «Aqrarkredit» bank olmayan kredit təşkilatı (46%), «Turanbank» ASC (4%) çıxış edir. Hazırda bankın ölkə üzrə 4 filialı, 7 bankomatı və 37 POS-terminalı fəaliyyət göstərir. Cari ilin yanvar ayının 1-nə bankın 24 130 müştərisi, 2 521 aktiv plastik kartı və 121 işçisi var.