Maliyyə

Ana səhifə

Maliyyə

Azərbaycan Hesablama Palatası hökumətə təkliflər paketi təqdim edib

30 mart 2012 11:40 (UTC +04:00)

Bakı. Əli Əhmədov - APA-Economics. Azərbaycan Hesablama Palatası büdcə vəsaitlərinin daha səmərəli istifadəsi və ona nəzarətin artırılması üçün hökumətə təkliflər verib. Bu təkliflər Hesablama Palatasının 2011-ci ildəki fəaliyyəti haqqında hesabatda əksini tapıb. «Azərbaycan Respublikası Hesablama Palatasının 2011-ci ildə fəaliyyəti haqqında Hesabat» Palatanın 2012-ci il martın 28-də keçirilən Kollegiya iclasında geniş müzakirə edilib.

«APA-Economics»in məlumatına görə, hesabatda Palatanın illik fəaliyyətinin nəticələri, İş Planında nəzərdə tutulmuş nəzarət tədbirləri və ekspert-analitik fəaliyyətin yekunları, o cümlədən həyata keçirilmiş hər bir nəzarət tədbiri və analitik təhlillərin nəticələri, dövlət büdcəsi və Dövlət Sosial Müdafiə Fondunun büdcəsi üzrə müvafiq qanun layihələrinə, dövlət büdcəsinin icrası haqqında qanun layihəsinə hazırlanmış rəylərin xülasəsi, habelə Palatanın cari fəaliyyətinin təşkili üzrə görülmüş işlər əks etdirilib.

Hesabatda əsas diqqət Palatanın nəzarət fəaliyyətinin nəticələrinin, o cümlədən audit keçirilən qurumlarda qanunvericiliyin tələblərinin pozulması hallarının, büdcə vəsaitlərindən istifadə zamanı buraxılmış nöqsan və çatışmazlıqların əks etdirilməsinə yönəldilib, eyni zamanda hər bir nəzarət tədbiri üzrə Palatanın təqdimatına əsasən həmin qurumlar tərəfindən görülmüş işlər və intizam tənbehi tədbirləri geniş qeyd olunub. Burda qeyd olunub ki, aparılmış nəzarət tədbirlər nəticəsində əvvəlki illərdə olduğu kimi 2011-ci ildə də Palatanın saxlanılmasına sərf edilmiş büdcə vəsaitindən dəfələrlə çox dövlət vəsaiti büdcəyə qaytarılıb, səmərəsiz xərclərin qarşısı alınıb və müvafiq qaydada uçota götürülüb. Eləcə də bu tədbirlər nəticəsində aşkar edilmiş nöqsan və çatışmazlıqların aradan qaldırılması üçün təxirəsalınmaz tədbirlər görülüb, yol verdikləri nöqsan və maliyyə pozuntularına görə aidiyyəti məsul şəxslər barəsində intizam tənbehi tətbiq edilib.

Hesabatda dövlət vəsaitlərindən istifadəyə nəzarətlə bağlı yeni təklif və tövsiyələr də əksini tapıb. Bu tövsiyələr dövlət büdcəsinin formalaşdırılmasına və dövlət büdcəsindən ayrılan vəsaitlərin təyinatı üzrə istifadə olunmasına, dövlət əmlakının və vəsaitlərinin idarə olunmasına dövlət nəzarətinin gücləndirilməsi, nəzarət mexanizmlərinin təkmilləşdirilməsi, bu sahədə şəffaflığın və hesabatlılığın artırılması, qanunvericilik aktlarında və normativ-metodiki sənədlərdə mövcud olan boşluqların və ziddiyyətlərin aradan qaldırılması məqsədi daşıyır.

Tədbirdə «Azərbaycan Respublikası Hesablama Palatasının 2011-ci ildə fəaliyyəti haqqında Hesabat» təsdiq edilib və sənədin Milli Məclisində müzakirə üçün təqdim olunması qərara alınıb.