Maliyyə

Ana səhifə

Maliyyə

Bakıda Azərbaycan-Litva Hökumətlərarası Komissiyasının iclası keçirilir - YENİLƏNİB - FOTO

Bakıda Azərbaycan-Litva Hökumətlərarası Komissiyasının iclası keçirilir - <font color=red>YENİLƏNİB - FOTO</font>

02 aprel 2012 13:07 (UTC +04:00)

Bakı. Əli Əhmədov - APA-Economics. Bu gün Bakıda Azərbaycan və Litva hökumətləri arasında ticarət-iqtisadi əməkdaşlıq üzrə ikitərəfli Hökumətlərarası Komissiyanın ikinci iclası keçirilib.

“APA-Economics”in xəbərinə görə, iclasda iki ölkə arasında siyasi, iqtisadi və humanitar sahələrdə əməkdaşlığın səviyyəsi müzakirə olunub, bu sahədə irəliləyişlərə nail olunduğu bildirilib.

Qeyd olunub ki, indiyə qədər təkcə iqtisadi sahədə 10-dan çox müxtəlif saziş imzalanıb. Gələcəkdə əməkdaşlığın daha da genişləndirilməsi üçün ticarət gəmiçiliyi, hava əlaqəsi, beynəlxalq avtomobil daşımaları, kənd təsərrüfatı, ətraf mühitin mühafizəsi, standartlaşdırma və metrologiya, elm, təhsil və texnologiya sahələrində sənəd layihələrinə baxılması prosesinin sürətləndirilməsi barədə razılıq əldə olunub.

İclasda hər iki tərəfin nümayəndələri investisiya mühiti, turizm potensialı, informasiya texnologiyaları və səhiyyə sahəsində aparılan islahatlarla bağlı təqdimatlarla çıxış ediblər. Toplantıda iki ölkə arasında sənayenin müxtəlif sahələri üzrə birgə istehsal müəssisələrin yaradılması da müzakirə olunub. Maşınqayırma, elektrotexnika, informasiya texnologiyaları və digər sahələrdə əlaqələrə dəstək verilməsi, qeyri-neft sektoruna investisiya yatırılmasına kömək göstərilməsi, enerji sektorunda əməkdaşlığın inkişafının vacibliyi vurğulanıb. Nəqliyyat sektorunda əməkdaşlıq, o cümlədən Az yüklərinin Litvanın Klaypeda dövlət dəniz limanı vasitəsilə daşınması, TRASECA dəhlizinin marşrutunun uzadılması imkanları müzakirə olunub.

Tərəflər arasında elektron hökumət və elektron imza sahəsində təcrübə mübadiləsi aparmaq barədə razılıq əldə olunub, Hökumətlərarası Komissiyanın saytı təqdim olunub. Sayt iki ölkənin sahibkarlarını investisiya imkanları barədə məlumatlandırmaq məqsədi güdür.

Komissiyanın Azərbaycandan olan həmsədri, vergilər naziri Fazil Məmmədov bildirib ki, iki ölkə arasında ticarət dövriyyəsinin həcmi ölkələrin potensial imkanlarından azdır və bunu artırmaq üçün əməkdaşlıq genişləndirilməlidir: “Ötən il Azərbaycan və Litva arasında ticarət dövriyyəsinin həcmi 25% azalaraq cəmi 25 mln. dollar təşkil edib”.

Komissiyanın Litvadan olan həmsədri, xarici işlər naziri Audronyus Ajubalis Azərbaycanın Avropa enerji təhlükəsizliyi prosesinin fəal iştirakçısı olduğunu, ölkələrin bu sahəyə, eləcə də qarşılıqlı investisiyalara maraq göstərdiyini söyləyib. Nazir Azərbaycanı Litvada bəzi layihələrə, o cümlədən konteyner marşrutu layihəsinə qoşulmağa və 3 mlrd. kubmetr tutumu olan sıxılmış qaz terminalının tikintisində iştirak etməyə dəvət edib.

Qeyd edək ki, Hökumətlərarası Komissiyanın iclasının yekunları ilə bağlı yekun protokol imzalanması gözlənilir.