Maliyyə

Ana səhifə

Maliyyə

Azərbaycanda bu ilin I rübündə icbari avtomobil sığortası üzrə 11 mln. manatdan çox sığorta haqqı yığılıb

03 aprel 2012 08:50 (UTC +04:00)

Bakı. Elnur Hüseynquluyev – APA-Economics. Azərbaycan İcbari Sığorta Bürosunun (İSB) müvafiq sığorta növü üzrə xidmətlərin göstərilməsi üçün icazəsi olan 10 iştirakçı-şirkət tərəfindən 2012-ci ilin yanvar-mart aylarında «Avtonəqliyyat vasitəsi sahiblərinin mülki məsuliyyətinin icbari sığortası» üzrə 11,1 mln. manat həcmində sığorta haqqı yığılıb.

İSB-dən «APA-Economics»ə verilən məlumata görə, bu ilin I rübündə ümumilikdə 146,5 min sığorta müqaviləsi bağlanılıb ki, bunun da 42,8 minini xarici ölkədə qeydiyyata alınmış və Azərbaycana tranzit məqsədilə daxil olan avtonəqliyyat vasitələri ilə bağlı olan və 1 ay müddətinə bağlanan sığorta müqavilələri təşkil edib.

Mart ayı ərzində isə «Avtonəqliyyat vasitəsi sahiblərinin mülki məsuliyyətini icbari sığortası» üzrə toplanan sığorta haqlarının həcmi 5,9 mln. manat olub. Ötən ay ərzində qeyd olunan sığorta növü üzrə 79,6 min sığorta müqaviləsi bağlanılıb ki, bunun da 18,1 minini xarici ölkədə qeydiyyata alınmış və Azərbaycana tranzit məqsədilə daxil olan avtonəqliyyat vasitələri ilə bağlı olan və 1 ay müddətinə bağlanan icbari sığorta müqavilələri təşkil edib.

Qeyd edək ki, fevral ayı ilə müqayisədə martda bu sığorta növü üzrə bağlanmış müqavilələrin sayında və sığorta daxilolmalarında təqribən 2 dəfə artım olub.

Xatırladaq ki, Büro 2011-ci ilin sonundan fəaliyyət göstərir. Büroya «Paşa Sığorta», «Atəşgah Sığorta», «Standard Insurance», «AtaSığorta», «Xalq Sığorta», «AXA-Mbask», «AzSığorta», «Alfa Sığorta», «Azərsığorta» Dövlət Sığorta Şirkəti və «Meqa Sığorta» şirkətləri üzv olub.