Maliyyə

Ana səhifə

Maliyyə

Azərbaycandakı turizm obyektlərinin 90%-i POS-terminallarla təmin edilib

17 aprel 2012 07:56 (UTC +04:00)

Bakı. Əli Əhmədov - APA-Economics. Azərbaycanda vergi və rüsumların ödəniş kartları vasitəsilə internet üzərindən ödənilməsinin təşkili ilə bağlı hazırlıq işləri yekunlaşdırılıb. «APA-Economics»in məlumatına görə, bunu vergilər naziri Fazil Məmmədov bildirib.

Onun sözlərinə görə, iqtisadiyyatda nağd hesablaşmaların minimuma endirilməsi üçün POS-terminalların quraşdırılması işi də sürətlənib: «Hazırda respublikanın bütün ərazisində, xüsusilə Bakı şəhəri və turizm xəritəsinə aid olan mərkəzlərdə fəaliyyət göstərən mehmanxanalar, ticarət, iaşə, istirahət və əyləncə obyektlərində, taksilərdə, yanacaqdoldurma məntəqələrində və digər sahələrdə POS-terminalların quraşdırılması təmin edilir». Artıq Bakıda POS-terminal quraşdırılmalı 25 445 aktiv obyektin 18 minində və ya 71%-də, turizm sektoruna aid olan obyektlərin isə 90%-dən çoxunda POS-terminallar fəaliyyət göstərir: «Qalan obyektlərdə isə yaxın 15-20 gün ərzində POS-terminalların quraşdırılması başa çatdırılacaq. Beləliklə, 6-10 min əlavə POS-terminal fəaliyyət göstərəcək», - deyə nazir vurğulayıb.

Ümumilikdə, respublika üzrə quraşdırılmış POS-terminalların sayı artıq 23 mini ötüb. Nazirin sözlərinə görə, cari ilin I rübü ərzində quraşdırılmış POS-terminalların sayında 2011-ci ilin müvafiq dövrünə nisbətən 9,3 dəfə, o cümlədən regionlarda 4,6 dəfə artım müşahidə olunub. F.Məmmədov bu sahədə bankların da fəallıq göstərdiyini qeyd edib: «Prosesinq mərkəzləri tərəfindən əvvəllər gün ərzində maksimum 15-20 POS-terminalın qeydiyyatının aparılması mümkün olduğu halda, hazırda elektron proseduraların tətbiqi nəticəsində bu rəqəm 400-ə çatdırılıb».

Bundan başqa, Nazirlər Kabinetinin qərarına uyğun olaraq, yanacaqdoldurma məntəqələrində kassa aparatlarının yeniləri ilə əvəz edilməsinə başlanıb. Yeni aparatlar əvvəlkilərdən fərqli olaraq çek vurulmadan neft məhsullarının və maye qazın müştərilərə buraxılmasını istisna edir. Artıq mövcud yanacaqdoldurma məntəqələrinin 67,8%-də yeni tipli aparatlar quraşdırılıb.