Maliyyə

Ana səhifə

Maliyyə

Azərbaycan Maliyyə Nazirliyi «Azərpoçt»a sığorta agenti lisenziyası verib

02 avqust 2012 08:54 (UTC +04:00)

«Azərpoçt»dan «APA-Economics»ə verilən məlumata görə, ötən ilin sonlarında «Azərpoçt» MMC ilə «Atəşgah» və «AtaSığorta» sığorta şirkətləri arasında sığorta işinin inkişaf etdirilməsinə və etibarlı şəkildə həyata keçirilməsinə, sığortalıların və sığortaçıların hüquq və mənafelərinin qorunmasına yönəldilən, sığortaçıların maliyyə sabitliyinin təmin edilməsinə, sığorta sahəsində fiziki və hüquqi şəxslərin peşəkar fəaliyyətinin göstərilməsinə və sığorta müqavilələrindən irəli gələn münasibətlərin tənzimlənməsinə dair müqavilə imzalanıb.

«Dünyanın hər yerində, xüsusən də inkişaf etmiş ölkələrdə vətəndaşların sığorta olunması diqqət mərkəzində saxlanılır. Bura tibbi sığortadan tutmuş, mülkiyyətin və insan həyatının sığortasına qədər hər şey daxildir. Ona görə də Avropa ölkələrində hər hansı bir insan bu problemlə üzləşəndə heç bir çətinlik yaşamır və hər şey çox asanlıqla həllini tapır. Yeni «İcbari sığorta haqqında» qanuna əsasən, avtomobil sığortası zamanı həyat və sağlamlığa dəyən zərər 50 min manat və 5 min manat, əmlaka dəyən zərərə görə də 20 min manatdır. Bir faktı da qeyd edək ki, qanuna görə sığorta ödənişindən imtina etmək üçün heç bir hal nəzərdə tutulmayıb. Zərərçəkənlər hər bir halda zərərin əvəzini ala biləcəklər. Lakin bəzi hallarda - təqsirkar sürücü sərxoş olduqda, hadisə yerini tərk etdikdə, hadisəni qəsdən törətdikdə, onun avtonəqliyyat vasitəsini idarə etməyə hüququ olmadıqda sığortaçı zərərçəkənlərə ödəniş verdikdən sonra ödədiyi məbləğləri təqsirkar sürücüdən tələb etmək hüququna malikdir. Eləcə də icbari fərdi qəza sığortası qaydalarına da dəyişiklik edilib», - deyə «Azərpoçt»dan bildirilib.

MMC-dən həmçinin qeyd ediblər ki, əvvəlki qanundan fərqli olaraq yeni qanuna əsasən sərnişin biletinin mövcudluğundan asılı olmayaraq sığorta haqqı ala bilərlər. Yəni qəza zamanı nəqliyyat vasitəsində xəsarət alan bütün sərnişinlər sığortadan faydalanacaq. Həmin qayda beynəlxalq və şəhərlərarası sərnişin daşınmaları xidməti göstərən hava, su, dəmiryolu və avtomobil nəqliyyatına şamil olunur. Daşınmaz əmlak üzrə minimum sığorta haqqı da müəyyənləşib. Belə ki, «İcbari sığorta haqqında» yeni qanuna əsasən daşınmaz əmlakın sığortası zamanı sığortalanan risklərin siyahısı genişləndirilib. Məsələn, köhnə qanundan fərqli olaraq indi əmlakın icbari sığortasına fiziki şəxslərin mənzilləri, yaşayış evləri də daxildir. Bu sahədə hər bölgə üçün sığorta məbləği təyin edilib. Belə ki, Bakı şəhəri üzrə bu məbləğ 25 min, Gəncə, Sumqayıt və Naxçıvan şəhərləri üçün 20 min, digər yerlər üçün isə 15 min təşkil edir. Sığorta haqqı isə müvafiq olaraq 50 manat, 40 manat və 30 manatdır.

«Ünvanlı sosial yardım alan şəxslərin əmlakının icbari sığortası üzrə sığorta haqları dövlət büdcəsi hesabına ödəniləcək. Yaşayış yerləri və mənzillərin «Daşınmaz əmlakın icbari sığortası» növü üzrə sığortalanması ilə bağlı vaxt məhdudiyyəti qoyulmayıb. Mənzildən istifadə hüququnu təsdiqləyən sənəd olduğu halda vətəndaş evini bu sığorta növü ilə sığortalaya bilər. Onu da qeyd edək ki, «İcbari sığorta haqqında» qanunun icrasına 2011-ci il dekabrın 16-dan başlanılıb. Hazırda «Azərpoçt» MMC bütün Regional Poçt Filiallarında fəaliyyət göstərən avtomobillərin icbari sığortası proseduraları əməliyyatçılar tərəfindən əhaliyə tam şəkildə izah edilərək sığorta şəhadətnamələrinin satışı həyata keçirilir», - deyə «Azərpoçt»dan bildirilib.