Maliyyə

Ana səhifə

Maliyyə

İcbari Sığorta Bürosunda qeydiyyata alınmış sığorta tələbləri üzrə ödənişlərin həcmi 1,4 mln. manata çatıb

14 avqust 2012 07:45 (UTC +04:00)

Bakı. Elnur Hüseynquluyev – APA-Economics. İcbari Sığorta Bürosunun informasiya sistemi vasitəsilə qeydiyyata alınmış sığorta tələbləri üzrə həyata keçirilmiş sığorta ödənişlərinin ümumi məbləği 1,4 mln. manata çatıb.

Bürodan «APA-Economics»ə verilən məlumata görə, Avtonəqliyyat vasitəsi sahiblərinin mülki məsuliyyətinin icbari sığortası üzrə İnformasiya Sistemində Büronun iştirakçıları olan 12 sığorta şirkəti («Paşa Sığorta», «Atəşgah», «Standard Insurance», «AtaSığorta» «Xalq Sığorta», «AXA-Mbask», «AzSığorta», «Alfa Sığorta», «Azərsığorta», «Meqa Sığorta», «İpək Yolu Sığorta» və «Azərbaycan Sənaye Sığorta») tərəfindən müvafiq icbari sığorta növü üzrə ümumilikdə 1 021 sığorta tələbi qeydiyyata alınıb.

Qeydiyyata alınmış sığorta tələblərindən 904-ü üzrə sığorta ödənişləri həyata keçirilib, 4 sığorta tələbi üzrə sığorta ödənişi verilməsindən imtina olunub, 113 sığorta tələbi isə hazırda baxılma mərhələsindədir.

Sığorta tələbləri üzrə həyata keçirilmiş sığorta ödənişlərinin ümumi məbləği isə 1,365 mln. manat təşkil edib.